வேதமும் விளக்கமும் அப்சலோமிற்கு 2 சாமு18:18 -குமாரன் இல்லை- 2 சாமு. 14:27- மூன்று குமாரர்கள் எது சரி?

29. 2 சாமுவேல் 18:18   அப்சலோம் உயிரோடே இருக்கையில் என் பேரை நினைக்கப்பண்ணும்படியாக எனக்குக் குமாரன் இல்லை என்று சொல்லி, ராஜாவின் பள்ளத்தாக்கிலே தனக்கென்று ஒரு தூணை நிறுத்தி அந்தத் தூணுக்குத் தன் பேரைத் தரித்திருந்தான் என்று சொல்லப்பட்டுள்ளது. ஆனால் 2 சாமுவேல் 14:27 இல் அப்சலோமிற்கு மூன்று குமாரர்கள் பிறந்தார்கள் என்று கூறப்பட்டுள்ளதே? (டி. நவமணி ஆபேல். நெய்வேலி, இந்தியா)

 

இதற்கு இருவகையான விளக்கங்கள் கொடுக்கப்பட்டுள்ளன. ஒன்றில் அபச்லோமின் மூன்று பிள்ளைகளும் இளவயதிலேயே மரணமடைந்திருக்க வேண்டும். இல்லையென்றால், அவர்களில் எவரும் அப்சலோமின் பெயரை நினைக்கப்பண்ணும்படியாக அவனுடைய பிள்ளைகளாக இருக்க விருப்பமற்றவர்களாக இருந்திருக்க வேண்டும். இவ்விரு விளக்கங்களில் முதலாவது விளக்கமே இன்று பெரும்பாலான வேத ஆராய்ச்சியாளர்களினால் ஏற்றுக்கொள்ளப்பட்டுள்ளது.  

 

 2 சாமுவேல் 14:27 

27. அப்சலோமுக்கு மூன்று குமாரரும், தாமார் என்னும் பேர்கொண்ட ஒரு குமாரத்தியும் பிறந்திருந்தார்கள்

வேதமும் விளக்கமும் -பிரசங்கி புத்தகம் எல்லாம் மாயை எனும் விரக்தி மனப்பான்மையில் எழுதப்படட்டுள்ளமைக்கான காரணம் என்ன?

பிரசங்கி புத்தகம் எல்லாம் மாயை எனும் விரக்தி மனப்பான்மையில் எழுதப்படட்டுள்ளமைக்கான காரணம் என்ன? (ஆர் தேவபாலன், யாழ்ப்பாணம்)

 

பிரசங்கியின் புத்தகம் மானிட வாழ்வை இரு கோணங்களில் அவதானித்துப் பார்த்து, இரு முக்கிய விடயங்களை நமக்குஅறியத் தருகின்றது. இப்புத்தகத்தை முழுமையாக வாசிக்கும்போது பிரசங்கி கூறும் இரண்டுவிதமான அறிவுறுத்தல்களையும் நாம் அறிந்திடலாம். ஒன்று சூரியனுக்கு கீழான இவ்வுலக வாழ்வு இது மாயையானது என பிரசங்கி கூறுகின்றது. மற்றது தேவனுடனான இவ்வுலக வாழ்வு இது மகிழ்ச்சிகரமானது என பிரசங்கி அறியத்தருகின்றது. எல்லாம் மாயை எனும் பிரசங்கியின் கூற்றை நாம் தவறாக விளங்கிக் கொள்ளக் கூடாது. புத்தகத்தின் பல இடங்களில் மாயை எனும் வார்த்தை சூரியனுக்குக் கீழே எனும் சொற்பிரயோகத்துடன் சோர்ந்து வருவதை நாம் அவதானிக்கலாம். உண்மையில் சூரியனுக்குக் கீழே எனும் சொற்பதம் மானிட வாழ்வை மானிட கோணத்திலிருந்து அவதானித்து அறிவிப்பதையே குறிக்கின்றது. இது தேவனை அறியாத ஒரு மனிதனுடைய உலக நோக்கு எப்படிப்பட்டது காண்பிக்கின்றது. தேவனை அறியாத இவ்வுலகத்தினால் மட்டுப்படுத்தப்பட்டமானிட வாழ்வு மாயையானது என்றே பிரசங்கி கூறுகின்றார். எனினும் மறுபுறத்தில் பிரசங்கி தேவனை அறிந்த ஒரு மனிதனுடைய வாழ்வு எப்படிப்பட்டது என்றும் அறியத் தருகின்றார். மனித வாழ்வில் தேவன்  இருக்கும்போது அது மகிழ்ச்சிகரமானதாக இருப்பதனால், வாழ்வை அனுபவிக்கும்படி அறிவுறுத்தியுள்ளார்

 

தேவனுக்குப் பயந்து அவருடைய கற்பனையின்படி வாழ்வதே மகிழ்ச்சியின் இரகசியம் என்பதனாலேயே, வாலிப காலத்திலேயே சிருஷ்டிகரை நினைக்கும்படியும் அவரது கற்பனைகளைக் கைக்கொண்டு வாழும்படியும் கட்டளையிட்டுள்ளார். எனவே, அப்புத்தகம் எல்லாம் மாயை என்றுமட்டும் கூறவில்லை. தேவனற்ற வாழ்வை மாயையானது என்று கூறும் பிரசங்கி, இவ்வுலக வாழ்வைத் தேவனோடு அனுபவிக்கும்படி அறிவுறுத்துகிறார். உண்மையில் பிரசங்கி என்பததற்கு மூலமொழியில் உபயோகிக்கப்பட்டுள்ள“கொஹெலெத்” எனும் பதம் உத்தியோகபூர்வமாக சபையைக் கூட்டி ஒரு கலந்துரையாடலைக ஆரம்பிப்பவனைக் குறிக்கும். இவன் ஒரு விடயத்தை சபைக்கு அறிமுகப்படுத்தி அதைப் பல்வேறு கோணங்களிலும் விமர்சித்து நடைமுறை ரீதியான ஒரு முடிவிற்கு வருவான். பிரசங்கி புத்தக ஆசிரியரும் இதேவிதமாக சூரியனுக்கு கீழான மானிடவாழ்வை இரு கோணங்களில் ஆராய்ந்து தனது கருத்தைத் தெரிவித்துள்ளார். இவ்வுலகில் தேவனற்ற வாழ்வு மாயையானது தேவனுடனான வாழ்வு மகழ்ச்சிகரமானதுஎன்பதே பிரசங்கியின் முடிவாகும். 

வேதமும் விளக்கமும்-ஆதியாகமம் 30:14-16 தூதாயீம் எத்தகைய கனி

26. ஆதியாகமம் 30:14-16 தூதாயீம் என்றொரு கனி பற்றி குறிப்பிடப்பட்டுள்ளது. இது எத்தகைய கனி? (ஆர். ரேவதி. கொழும்பு-10)

 

இது மத்தியத்தரைக் கடற்கரைப் பகுதிகளில் வளரும் ஒரு வகையான செடியின் கனியாகும். இச்செடித் தண்டுகள் அற்றதும் நீள்வட்ட இலைகளை உடையதுமான தாவரமாகும். இச்செடியின் மலர்கள் ஊதா நிறமுடையதாகவும், பழுத்த கனிகள் செம்மஞ்சள் நிறமுடையதாகவும் இருக்கும். அதிக வாசனையுடைய இப்பழங்கள் (உன். 7:13) பாலுணர்வைத் தூண்டுபவையாகவும் கருத்தரிப்பதற்கு உதபவுபவையாகவும் இருப்பதாக மத்தியதரைக் கடல் பிரதேசங்களிலுள்ள நாடுகளில நம்பப்பட்டு வந்துள்ளது. இதனால் இக்கனிகள் பாலுணர்வுக் கனிகள் என்றும் காதற் கனிகள் என்றும் அழைக்கப்பட்டலாயிற்று. ஆதியாகமம் 30 ஆம் அதிகாரத்தில் பிள்ளையில்லாது மலடியாயிருந்த ராகேல் இக்கனிகளை விரும்பியதற்கு காரணம் அவை கருத்தரிப்பதற்கு உதவுபவை எனும் அக்கால மக்களது நம்பிக்கையாகும். எனினும் இன்றைய மருத்துவத்துறை இக்கனிகளுககு கருத்தரிக்க வைக்கும் சக்தி எதுவும் இல்லை என்பதைக் கண்டுபிடித்துள்ளது. இக்கனியை அதிகமாகச் சாப்பிட்டால் ஒருவித மயக்க நிலை சரீரத்திற்கு ஏற்படும் என்பதையும் அறியத் தந்துள்ளது. அத்தகைய மக்கநிலையே பாலுணர்வுத் துண்டுதலுக்கான காரணமாக கருதப்பட்டிருக்கலாம்.

 

 

 

 

 ஆதியாகமம் 30:14-16 

14. கோதுமை அறுப்பு நாட்களிலே ரூபன் வயல்வெளியிலே போய், தூதாயீம் கனிகளைக் கண்டெடுத்து, அவைகளைக் கொண்டுவந்து தன் தாயாகிய லேயாளிடத்தில் கொடுத்தான். அப்பொழுது ராகேல் லேயாளை நோக்கி: உன் குமாரனுடைய தூதாயீம் கனியில் எனக்குக் கொஞ்சம் தா என்றாள்.

15. அதற்கு அவள்: நீ என் புருஷனை எடுத்துக்கொண்டது அற்பகாரியமா? என் குமாரனுடைய தூதாயீம் கனிகளையும் எடுத்துக்கொள்ளவேண்டுமோ என்றாள்; அதற்கு ராகேல்: உன் குமாரனுடைய தூதாயீம் கனிகளுக்கு ஈடாக இன்று இரவு அவர் உன்னோடே சயனிக்கட்டும் என்றாள்.

16. சாயங்காலத்தில் யாக்கோபு வெளியிலிருந்து வருகையில் லேயாள் புறப்பட்டு அவனுக்கு எதிர்கொண்டுபோய்: என் குமாரனுடைய தூதாயீம் கனிகளால் உம்மைக் கொண்டேன்; ஆகையால், நீர் என்னிடத்தில் வரவேண்டும் என்றாள்; அவன் அன்று இரவு அவளோடே சயனித்தான். 

 

உன்னதப்பாடு. 7:13

13. தூதாயீம் பழம் வாசனை வீசும்; நமது வாசல்களண்டையிலே புதியவைகளும் பழையவைகளுமான சகலவித அருமையான கனிகளுமுண்டு; என் நேசரே! அவைகளை உமக்கு வைத்திருக்கிறேன். 

வேதமும் விளக்கமும்-1 சாமுவேல் 16:14தேவன் பொல்லாத ஆவிகளை அனுப்பி மனிதனை கலங்கப் பண்ணுவாரா?

25. 1 சாமுவேல் 16:14 இன்படி கர்த்தரால் வரவிடப்பட்ட ஒரு பொல்லாத ஆவி அவனைக் கலங்கப் பண்ணிக் கொண்டிருந்தது என்று குறிப்பிடப்பட்டுள்ளது. தேவன் பொல்லாத ஆவிகளை அனுப்பி மனிதனை கலங்கப் பண்ணுவாரா? (ஜோன் டிக்சன், கெங்கல்ல, இலங்கை)

 

பொல்லாத ஆவியை அனுப்பி தேவன் எவரையும் கலங்கப் பண்ணுபவரல்ல. வேதாகம ஆசிரியர்கள், அனைத்தும் தேவனுடைய ஆளுகையின் கீழும் கட்டுப்பாட்டின் கீழும் இருப்பதை அநிந்திருந்தமையில், அவர் அனுமதிப்பவைகளையும் அவரால் செய்யப்பட்டவைகளாகவே குறிப்பிட்டுள்ளனர். மத்தேயு 8ஆம் அதிகாரத்தில் மனிதனுக்குள் இருந்த பிசாசுக்கள் பன்றிகளுக்குள்ள செல்ல இயேசுவிடம் அனுமதி கேட்டபோது இயேசு கிறிஸ்து போங்கள் என்று கட்டளையிட்டார். (மத். 8:31-32) இதனால் இயேசுவே பிசாசுக்களைப் பன்றிக்குள் அனுப்பினார் என நாம் எண்ணலாம். எனினும் பிசாசுக்கள் பன்றிக்குள் செல்வதற்கு இயேசு கிறிஸ்து நேரடியாக் காரணமாக இருக்கவில்லை. பிசாசுக்கள் என்ன செய்ய விரும்பினவோ அதைச் செய்வதற்கே இயேசு கிறிஸ்து அனுமதி கொடுத்துள்ளார. இதேவிதமாகத்தான் சவுலைக் கலங்கப் பண்ணிய பொல்லாத ஆவியும் தேவனால் அனுமதிக்கப்பட்டதொன்றாக இருக்கின்றதே தவிர அவரால் நேரடியாக அனுப்பப்பட்டதொன்றாக இல்லை தேவனுடைய ஆவி சவுலில் இருக்கும்வரை பொல்லாத ஆவியால் அனை அணுகமுடியவில்லை. ஆனால் சவுல் பல தடவைகள் கர்த்தருடைய வார்த்தையை மீறி நடந்தமையால் தேவதண்டனை அவன் மீது வந்தது. கடைசியில் கர்த்தருடைய ஆவியினவர் அவனை விட்டுச் சென்றபின் அவன் தேவனடைய ஆளுகையின் கீழ் இராதமையால் பிசாசினால் அவனை இலகுவாகத் தாக்கக் கூடியதாக இருந்தது. சவுலைத் தாக்க கர்த்தரால் அனுமதிக்கப்பட்ட பொல்லாத ஆவியையே 1 சாமுவேல் புத்தக ஆசிரியர் கர்த்தரால் வரவிடப்படட ஆவி எனக் குறிப்பிட்டுள்ளது. 

 

இதை நாம் முழுமையாக விளங்கிக் கொள்ள யோபுவின் சரிதை பெரிதும் உதவுகின்றது. பிசாசு தேவனின் அனுமதியுடன் யோபுவைத் தாக்கினான். யோபுவின் துயர நிலைக்குக் காரணம் பிசாசே. யோபைத் தாக்கத் தேவன் பிசாசுக்கு அனுமதி மட்டுமே கொடுத்திருந்தார். அப்படியிருந்தும் யோபு தன் துயர நிலையைப் பற்றிக் கூறும்போது கர்த்தர் கொடுத்தார் கர்த்தர் எடுத்தார் என்று தனது துயரத்திற்கு காரணம் தேவனே என கூறினான். ஆனால் யோபினுடைய செல்வங்கள் அனைத்தையும்அவனிடமிருந்து எடுத்தது கர்த்தரல்ல பிசாசே அனைத்தையும் எடுத்தான். இதேவிதமாகத்தான் கர்த்தரால் அனுமதிக்கப்பட்ட சவுலைக் கலங்கப் பண்ணிய பொல்லாத ஆவி கர்த்தரால் விரட்டப்பட்ட ஆவி என சொல்லபபட்டுள்ளதை தவிர தேவன் பொல்லாத செயல்களைச் செய்பவர் என்பது இவ்வசனத்தின் அர்த்தம் அல்ல. யாக்கோபு முதல் அதிகாரம் 13ம் வசனத்தில் 13. சோதிக்கப்படுகிற எவனும், நான் தேவனால் சோதிக்கப்படுகிறேன் என்று சொல்லாதிருப்பானாக; தேவன் பொல்லாங்கினால் சோதிக்கப்படுகிறவரல்ல, ஒருவனையும் அவர் சோதிக்கிறவருமல்ல. என்ற உண்மையை அறிந்திடலாம்

 

 

1 சாமுவேல் 16:14 

கர்த்தருடைய ஆவி சவுலை விட்டு நீங்கினார்; கர்த்தரால் வரவிடப்பட்ட ஒரு பொல்லாத ஆவி அவனைக் கலங்கப்பண்ணிக்கொண்டிருந்தது. 

 

மத். 8:31-32

31. அப்பொழுது, பிசாசுகள்: நீர் எங்களைத் துரத்துவீரானால், நாங்கள் அந்தப் பன்றிக்கூட்டத்தில் போகும்படி உத்தரவு கொடும் என்று அவரை வேண்டிக்கொண்டன.

32. அதற்கு அவர்: போங்கள் என்றார். அவைகள் புறப்பட்டு, பன்றிக்கூட்டத்தில் போயின. அப்பொழுது, பன்றிக் கூட்டமெல்லாம் உயர்ந்த மேட்டிலிருந்து கடலிலே பாய்ந்து, ஜலத்தில் மாண்டு போயின. 

வேதமும் விளக்கமும் - அந்நிய பாஷையில் பேசுவது என்பது என்ன?

அந்நிய பாஷையில் பேசுவது என்பது என்ன? அந்நிய பாஷையில் பேசுகிறவர்கள் அது சாத்தானுக்கு விளங்காது. தேவனுக்கும் பேசுகிறவர்களுக்கும் மட்டும்தான் புரியும் என்று சொல்கிறார்கள். ஆனால் அப்போஸ்தலர் 2ம் அதிகாரத்தில் மேல் வீட்டில் ஜெபித்துக் கொண்டிருந்த 120 பேர் பேசிய அந்நிய பாஷை மற்றவர்களுக்கு விளங்கியதாக குறிப்பிடப்பட்டுள்ளது. (7 முதல் 1 வரையிலான வசனங்கள்) எனவே இது பற்றி விளக்கம் தாருங்கள் (திருமதி. பி.நடரைாஜா, மாத்தளை)

 

அந்நிய பாஷையில் பேசுவதைப் பற்றி நாம் சரியாக அறிந்து கொள்ள வேண்டுமாயின் அது பற்றி வேதாகமத்தில் குறிப்பிடப்பட்டிருக்கும் அனைத்து வேதப் பகுதிகளையும் ஆராய்ந்து பார்க்க வேண்டும். அதேசமயம் அந்நிய பாஷை பற்றி பலவிதமான கருத்து முரண்பாடுகள் இன்று கிறிஸ்தவர்கள்மத்தியில் ஏற்பட்டுள்ளது. சிலர் அந்நிய பாஷை மானிட மொழி என கருதுகின்றனர். அதாவது இவ்வுலக மனிதர் பேசும் மொழி. ஆனால் பேசுபவர் அம்மொழியை அறியாதவர். அவர் ஆவியானவரின் அருளினால் தான் அதுவரையில் அறிந்திராத வேறு ஒரு மொழியில் பேசுகிறார். அதுவே அந்நிய பாஷை என்பதே இவர்களது கருத்தாகும். இவர்கள் தங்கள் கருத்திற்கு ஆதாரமாக அப்போஸ்தலர் 2ஆம் அதிகாரத்தையே சுட்டிக்காட்டுவர். இதற்குக் காரணம் பெந்தகோஸ்தே தினத்தில் பரிசுத்த ஆவியினால் நிரப்படப்டவர்கள் ஆவியானவர் தங்களுக்குத்கு தந்தருளின வெவ்வேறு பாஷைகளிலே பேசினபோது அவ்விடத்திற்கு வந்திருந்த வெவ்வேறு பாஷைக்காரர்கள் தங்கள் பாஷைகளிலியேயே அவர்கள் பேசுகிறதைக் கேட்டார்கள். இதிலிருந்து அந்நிய பாஷை உலகில் பேசப்படும் மானிட மொழி என்பதை அறிந்துக் கொண்டாலும் இந்த சம்பவத்தை மட்டும் அடிப்படையாகக் கொண்டு ஒரு வரைவிலக்கணத்தைக் கொடுக்க முடியாது. 

 

1 கொரிந்தியர் 14:2இல் அந்நியபாஷையில் பேசுகிறவன், ஆவியிலே இரகசியங்களைப் பேசினாலும், அவன் பேசுகிறதை ஒருவனும் அறியாதிருக்கிறபடியினாலே, அவன் மனுஷரிடத்தில் பேசாமல், தேவனிடத்தில் பேசுகிறான். என்று அவ்வசனத்தில் குறிப்பிடப்பட்டுள்ளது. இதிலிருந்து அந்நிய பாஷை மனிதர்களுக்கு விளங்காத பாஷை என்பது தெளிவாகின்றது. அப்போஸ்தலர் 2இன் அந்நியபாஷை மற்றவர்களுக்கு விளங்கிக்கூடிய ஒரு மொழியாக இருக்கையில் 1 கொரிந்தியர் 14இல் அந்நிய பாஷை தேவனைத் தவிர வேறு எவராலும் புரிந்து கொள்ள முடியாத அந்நிய பாஷையாக உள்ளது. மேலும் 1 கொரிந்தியர் 13:1 இல் பவுல் தேவர்களின் பாஷைகளைப் பேசுவதைப் பற்றியும் குறிப்பிட்டுள்ளார். இவற்றையெல்லாம் கருத்திற்கொண்டு பார்க்கும்போது அந்நியபாஷை வரம் என்பது மானிட மொழிகளையும் மனிதர்களுக்கு எவ்விதத்திலும் புரியாத ஆவியின் ஏவுதலால் பேசப்படும் வார்த்தைகளையும் உள்ளடக்கியதொன்றாகவே உள்ளது என்பதை அறிந்திடலாம் அந்நியபாஷையில் பேசும் சிலர் இன்னுமாரு மானிட மொழியில் பேசுகின்றனர். வேறுசிலர் எவருக்கும் புரியாத மொழிகளைப் பேசுகின்றனர். இவ்விருவதும் பேசுவது ஆவியானவர் அருளும் அந்நிய பாஷையின் வரமாகவே இருக்கின்றது. இதனால்தான் 1 கொரிந்தியர் 12:10 இல் அந்நியப்பாஷை வரத்தைப் பற்றி குறிப்பிடும்போது “பற்பல பாஷைகளைப் பேசுதல்” என்று என்று பவுல் குறிப்பிட்டுள்ளார். 

 

1 கொரிந்தியர் 13:1  

 1. நான் மனுஷர் பாஷைகளையும் தூதர்பாஷைகளையும் பேசினாலும், அன்பு எனக்கிராவிட்டால், சத்தமிடுகிற வெண்கலம்போலவும், ஓசையிடுகிற கைத்தாளம்போலவும் இருப்பேன். 

 

 

1 கொரிந்தியர் 12:10  

10. வேறொருவனுக்கு அற்புதங்களைச்செய்யும் சக்தியும், வேறொருவனுக்குத் தீர்க்கதரிசனம் உரைத்தலும், வேறொருவனுக்கு ஆவிகளைப் பகுத்தறிதலும், வேறொருவனுக்குப் பற்பல பாஷைகளைப்பேசுதலும், வேறொருவனுக்குப் பாஷைகளை வியாக்கியானம்பண்ணுதலும் அளிக்கப்படுகிறது. 

வேதமும் விளக்கமும்-யோவான் 2:4 இல் இயேசு தன் தாயாரை ஸ்திரியே என்றழைப்பதன் காரணம் என்ன?

யோவான் 2:4 இல் இயேசுகிறிஸ்து தன் தாயாரை ஸ்திரியே என்று அழைக்கிறார். யோவான் 8:10 பாவியான பெண்ணையும் அதேவிதமாக ஸ்திரியே என்றே அழைக்கிறார். இதன் அர்த்தம் என்ன? (எம்.எக்ஸ்.ஜெரால்ட், ஊட்டி, இந்தியா)

 இயேசுகிறிஸ்து தன்னுடைய பகிரங்க ஊழிய காலத்தில் பெண்களை இவ்விதமாகவே அழைத்துள்ளார். மத்தேயு 15:28 இலும் லூக்கா 13:12 இலும் பிசாசின் பிடியிலிருக்கும் தன் மகளை விடுவிக்கும்படி கேட்ட கானானியப் பெண்ணையும் யோவான் 4:21 இல் சாமாரியப்பெண்ணையும், யோவான் 20:15 இல் மகதலேனா மரியாளையும் யோவான் 2:4 மற்றும் 19:26 இல் தன் தயாயாரையும் ஸ்திரியே என்றே அழைத்துள்ளார். எனினும் ஸ்திரியே என்பதற்கு மூலமொழியில் உபயோகிக்கப்பட்டுள்ள பதம் மரியாதைக் குறைவான பதம் அல்ல.அப்பதம் மரியாதையுடனும் பண்புடனும் பெண்ணை அழைப்பதற்கு அக்காலத்தில் உபயோகிக்கப்பட்ட பதமாகும். அக்கால யூத சமுதாயம் பெண்களைத் தாழ்வானவர்களாகக் கருதிய போதிலும் இயேசு கிறிஸ்து பெண்களைப் பற்றி அவ்விதமான எண்ணங் கொண்டிருக்கவில்லை. இதனால் எல்லோரையும் மரியாதையுடனும்“ பண்புடனும் அவர் அழைத்துள்ளார். 

இயேசு கிறிஸ்து பெண்களை அழைக்க உபயோகித்த பதம் மூலமொழியில் மரியாதைமிக்க ஒரு பதமாயினும் மகன் தாயை அழைப்பதற்கு அப்பதம் பொருத்தமற்றது. இயேசு கிறிஸ்து இவ்வாறு தன் தாயாரை அழைக்க காரணம், அவர் தன் பகிரங்க ஊழியத்தை ஆரம்பித்த பின்னர் தனக்கும் மரியாளுக்கு இடையே அதுவரை காலமும் இருந்த உறவுமுறை மாற்றபப்பட்டமையாகும். உண்மையில் இயேசு கிறிஸ்து தன் பகிரங்க ஊழியத்தை ஆரம்பிக்கும்வரை மரியாளை அம்மா என்றே அழைத்திருக்க வேண்டும். ஆனால் பகிரங்க ஊழியத்தை ஆரம்பித்த பின்னர் மரியாளையும் மற்றப் பெண்களைப் போல் ஸ்திரியே என்றே அழைத்தார். அதன் பின்னர் அவர் மரியாளின் மகனாக அல்ல மாறாக தேவனுடைய குமாரனாகவே செயல்பட்டார். அதுவரை காலமும் தன்பூலோக பெற்றோருக்’கு கீழ்படிந்து வாழ்ந்தவர், பகிரங்க ஊழிய காலத்தில் பரலோகப் பிதாவின் சித்தத்தின்படியே செயல்பட்டார். இயேசு கிறிஸ்து தன்னுடைய பகிரங்க ஊழியத்தை ஆரம்பித்த பின்னர் அதுவரை காலமும் மரியாளுக்கும் இயேசுவுக்கும் இடையே இருந்த உறவு முறை மாற்றப்பட்டமையினால் அவர் அது வரைகாலமும் மரியாளை அழைத்தவிதமாக அவளை அழைப்பதை நிறுத்திக் கொண்டார். 

 

யோவான் 2:4 

அதற்கு இயேசு: ஸ்திரீயே, எனக்கும் உனக்கும் என்ன, என் வேளை இன்னும் வரவில்லை என்றார்.

 

யோவான் 8:10 

இயேசு நிமிர்ந்து அந்த ஸ்திரீயைத் தவிர வேறொருவரையுங் காணாமல்: ஸ்திரீயே, உன்மேல் குற்றஞ்சாட்டினவர்கள் எங்கே? ஒருவனாகிலும் உன்னை ஆக்கினைக்குள்ளாகத் தீர்க்கவில்லையா என்றார். 

 

 மத்தேயு 15:28 

28. இயேசு அவளுக்குப் பிரதியுத்தரமாக: ஸ்திரீயே, உன் விசுவாசம் பெரிது; நீ விரும்புகிறபடி உனக்கு ஆகக்கடவது என்றார். அந்நேரமே அவள் மகள் ஆரோக்கியமானாள். 

 

லூக்கா 13:12 

இயேசு அவளைக் கண்டு, தம்மிடத்தில் அழைத்து: ஸ்திரீயே, உன் பலவீனத்தினின்று விடுதலையாக்கப்பட்டாய் என்று சொல்லி,

 

 

யோவான் 20:15

இயேசு அவளைப் பார்த்து ஸ்திரீயே, ஏன் அழுகிறாய், யாரைத் தேடுகிறாய் என்றார். அவள், அவரைத் தோட்டக்காரனென்று எண்ணி: ஐயா, நீர் அவரை எடுத்துக்கொண்டுபோனதுண்டானால், அவரை வைத்த இடத்தை எனக்குச் சொல்லும், நான் போய் அவரை எடுத்துக்கொள்ளுவேன் என்றாள்.

 

யோவான் 2:4 

அதற்கு இயேசு: ஸ்திரீயே, எனக்கும் உனக்கும் என்ன, என் வேளை இன்னும் வரவில்லை என்றார். 

 

 யோவான் 19:26 

அப்பொழுது இயேசு தம்முடைய தாயையும் அருகே நின்ற தமக்கு அன்பாயிருந்த சீஷனையும் கண்டு, தம்முடைய தாயை நோக்கி: ஸ்திரீயே, அதோ, உன் மகன் என்றார். 

 

 

 

 

 மேலதிக விளக்கத்திற்கு இந்த தொடுப்பினைப் பார்க்கவும்

ஸ்திரியே எனக்கும் உனக்கும் என்ன? என் வேளை இன்னும் வரவில்லை 

வேதமும் விளக்கமும் -ஆதி.37:9 -10 ஆம் வசனங்களில் யோசேப்பை எப்படி அவரது தாயும் வந்து வணங்கியிருப்பார்?

ஆதியாகமம் 37:9 ஆம் 10 ஆம் வசனங்களில் யோசேப்பின் சொப்பனத்தில் தனது தகப்பனும் தாயும் தனது சகோதர்களும் தன்னை பணிந்து வணங்கினார்கள் என்று கூறப்பட்டுள்ளது. இதில், யோசேப்பு இந்த சொப்பனத்தைக் காணும் போது, அவருடைய தகப்பனும், சகோதர்களுமே தன்னை பணிந்து வணங்கினார்கள் என்று கூறப்பட்டுள்ளது இதில் யோசேப்பு இந்த சொப்பனத்தைக் கா’ணும்போது அவருடைய தகப்பனும், சகோதர்களுமே உயிரோடு இருந்தனர். அவரது தாய் ராகேல் முன்பே இறந்து விட்டார். இதனைப் பார்க்கும்போது அவரது சகோதர்கள் மற்றும் தகப்பன் மட்டுமே எகிப்து தேசத்தில் யோசேப்பு அதிபதியாய் இருக்கும்போது அவனை வணங்கினர். எப்படி அவரது தாயும் வந்து வணங்கியிருப்பார். இதற்கு விளக்கம் தாருங்கள்.

 

யோசேப்பு கண்ட இச்சொப்பனத்தில் சந்திரன் அவனது தாயாராகவே குறிப்பிட்டப்பட்டுள்ளது எனினும் அச்சமயம் அவள் உயிரோடிராதமையால், ராகேலின் சகோதரியும் யாக்கோபின் முதல் மனைவியுமான லேயாளே இவ்விடத்தில் யோசேப்பின் தாயாக குறிப்பிட்டுள்ளார் என்று வேத ஆராய்ச்சியாளர்கள் கருதுகின்றனர். 

 

 

ஆதியாகமம் - 37 அதிகாரம்

9. அவன் வேறொரு சொப்பனம் கண்டு, தன் சகோதரரை நோக்கி: நான் இன்னும் ஒரு சொப்பனத்தைக் கண்டேன்; சூரியனும் சந்திரனும் பதினொரு நட்சத்திரங்களும் என்னை வணங்கினது என்றான்.

10. இதை அவன் தன் தகப்பனுக்கும் தன் சகோதரருக்கும் சொன்னபோது, அவன் தகப்பன் அவனைப் பார்த்து: நீ கண்ட இந்தச் சொப்பனம் என்ன? நானும் உன் தாயாரும் உன் சகோதரரும் தரைமட்டும் குனிந்து உன்னை வணங்க வருவோமோ? என்று அவனைக் கடிந்துகொண்டான். 

வேதமும் விளக்கமும் நியாயாதி 1: 19 கர்த்தருடைய வல்லமையினால் இருப்புரதங்களை மேற்கொள்ள முடியவில்லையா?

நியாயாதிபதிகள் 1: 19கர்த்தர் யூதாவோடேகூட இருந்ததினால், மலைத்தேசத்தாரைத் துரத்திவிட்டார்கள்; பள்ளத்தாக்கின் குடிகளுக்கு இருப்புரதங்கள் இருந்தபடியினால், அவர்களைத் துரத்தக் கூடாமற்போயிற்று என்று சொல்லப்பட்டுள்ளது. அப்படியானால் கர்த்தருடைய வல்லமையினால் இருப்புரதங்களை மேற்கொள்ள முடியவில்லையா? 

இவ்வசனத்தை மட்டும் வாசிக்கும்போது கர்த்தரை விட இருப்பு இரதங்களுக்கு வல்லமை அதிகம் என்றே எண்ணத் தோன்றும். ஆனால் நியாயாதிபதிகள் 2ம் அதிகாரத்தில் முதல் மூன்று வசனங்களையும் பார்க்கும்போது இஸ்ரவேல் மக்கள், எல்லோரோடும் யுத்தம் பண்ணவில்லை என்பதை அறிந்திடலாம். இதற்காக கர்த்தர் அவர்களை கடிந்து கொள்கிறார். கர்த்தர் யூதாவோடே இருந்தும் அவர்கள் பள்ளத்தாக்கின் குடிகளோடு யுத்த்திற்கு செல்லவில்லை. இதற்கு காரணம் பள்ளத்தாக்கின் குடிகளிடம் இருப்பு இரதங்கள் இருந்தமையாகும். அவர்கள் யுத்தத்திற்கு சென்றிருந்தால் பள்ளத்தாக்கின் குடிகளையும் அவர்கள் துரத்தி விட்டிருப்பார்கள். இருப்பு ரதம் எதிரிகளிடம் இருக்கின்றது என்பதனால் அவர்கள் யுத்தத்திற்கு செல்லாமல் இருந்து விட்டார்கள் இதனால் அவர்களை துரத்தக் கூடாமற் போயிற்று.  

 நியாயாதிபதிகள்

2 அதிகாரம்

1. கர்த்தருடைய தூதனானவர் கில்காலிலிருந்து போகீமுக்கு வந்து: நான் உங்களை எகிப்திலிருந்து புறப்படப்பண்ணி, உங்கள் பிதாக்களுக்கு ஆணையிட்ட தேசத்தில் நான் உங்களைக் கொண்டுவந்து விட்டு, உங்களோடே பண்ணின என் உடன்படிக்கையை நான் ஒருக்காலும் முறித்துப்போடுவதில்லை என்றும்,

2. நீங்கள் இந்த தேசத்தின் குடிகளோடே உடன்படிக்கைபண்ணாமல், அவர்கள் பலிபீடங்களை இடித்துவிடக்கடவீர்கள் என்றும் சொன்னேன்; ஆனாலும் என் சொல்லைக் கேளாதேபோனீர்கள்; ஏன் இப்படிச் செய்தீர்கள்?

3. ஆகையால் நான் அவர்களை உங்கள் முகத்திற்கு முன்பாகத் துரத்துவதில்லை என்றேன்; அவர்கள் உங்களை நெருக்குவார்கள்; அவர்களுடைய தேவர்கள் உங்களுக்குக் கண்ணியாவார்கள் என்றார்.

வேதமும் விளக்கமும் -சிமியோன் மரியாளிடம் உன் ஆத்துமாவையும் ஒரு பட்டயம் உருவிப்போகும் என்று சொல்வதற்கான காரணம் என்ன?

19. இயேசுகிறிஸ்து குழந்தையாயிருந்தபோது அவரைத் தன் கைகளில் ஏந்திக்கொண்டு அவருக்காக தேவனைத் ஸ்தோத்தரிக்கும் சிமியோன் மரியாளிடம் உன் ஆத்துமாவையும் ஒரு பட்டயம் உருவிப்போகும் என்று சொல்வதற்கான காரணம் என்ன? 

 

லூக்கா 2ஆம் அதிகாரம் 33முதல் 35 வரையிலான வசனங்களில் இயேசுகிறிஸ்துவின் ஊழியத்தைப் பற்றி சிமியோன் கூறிய தீர்க்கதரிசனத்தை நாம் வாசிக்கலாம். அதில், இயேசுகிறிஸ்துவுக்கு வரும் எதிர்ப்புக்களையும் அவர் குறிப்பிட்டுள்ளார். உண்மையில் இயேசுகிறிஸ்துவின் ஊழியம் அவரது சிலுவை மரணத்தையும் உள்ளடக்கியதொன்றாகும். இயேசுகிறிஸ்துவின் மரணம் அவரைத் தன் வயிற்றில் சுமந்து பெற்ற மரியாளுக்கு அதிக வேதனையளிப்பதாய் இருக்கும். இயேசுகிறிஸ்துவின் மரணத்தின் மூலமாக மரியாளுக்கு வரும் கடுமையான வேதனையே சிமியோன். உன் ஆத்துமாவையும் ஒருபட்டயம் உருவிப் போகும் என முன்னறிவித்தார். 

 

லூக்கா 2 :33- 35  

 

33. அவரைக்குறித்துச் சொல்லப்பட்டவைகளுக்காக யோசேப்பும் அவருடைய தாயாரும் ஆச்சரியப்பட்டார்கள்.

34. பின்னும் சிமியோன் அவர்களை ஆசீர்வதித்து, அவருடைய தாயாகிய மரியாளை நோக்கி: இதோ, அநேகருடைய இருதய சிந்தனைகள் வெளிப்படத்தக்கதாக, இஸ்ரவேலில் அநேகர் விழுகிறதற்கும் எழுந்திருக்கிறதற்கும், விரோதமாகப் பேசப்படும் அடையாளமாவதற்கும், இவர் நியமிக்கப்பட்டிருக்கிறார்.

35. உன் ஆத்துமாவையும் ஒரு பட்டயம் உருவிப்போகும் என்றான். 

வேதமும் விளக்கமும்-மத்.10:5 இல் இயேசுகிறிஸ்து தன் சீடர்களை சமாரியர் பட்டணங்களுக்குப் போகவேண்டாம் என ஏன் கூறினார்?

மத்தேயு 10ஆம் அதிகாரத்தில் இயேசுகிறிஸ்து தனது 12 அப்போஸ்தலர்களையும் முதல் தடவையாக ஊழியத்திற்கு அனுப்பும் சம்பவமே குறிப்பிடப்பட்டுள்ளது. அச்சமயம் அவர் அவர்களிடத்தில்  நீங்கள் புறஜாதியார் நாட்டுக்குப் போகாமலும், சமாரியர் பட்டணங்களில் பிரவேசியாமலும், காணாமற்போன ஆடுகளாகிய இஸ்ரவேல் வீட்டாரிடத்திற்குப் போங்கள் என கூறினார். இயேசுகிறிஸ்து தனது ஊழியத்தின் இறுதியில் சீடர்களை உலகெங்கும்போய் சுவிஷேசத்தை அறிவிக்கச் சொன்னாலும் (மத். 28:19) முதலில் இஸ்ரவேல் மக்களிடமே அவர்களை அனுப்பினார். 

மத்தேயு 10:5

5. இந்தப் பன்னிருவரையும் இயேசு அனுப்புகையில், அவர்களுக்குக் கட்டளையிட்டுச் சொன்னது என்னவென்றால்: நீங்கள் புறஜாதியார் நாட்டுக்குப் போகாமலும், சமாரியர் பட்டணங்களில் பிரவேசியாமலும்,

மத்தேயு. 28:19
19. ஆகையால், நீங்கள் புறப்பட்டுப்போய் சகல ஜாதிகளையும் சீஷராக்கி, பிதா குமாரன் பரிசுத்த ஆவியின் நாமத்திலே அவர்களுக்கு ஞானஸ்நானங்கொடுத்து,

மேலதிக விபரங்களுக்கு

நீங்கள் புறஜாதியார் நாட்டுக்குப் போகாமலும், ….. ,காணாமற் போன ஆடுகளாகிய இஸ்ரவேல் வீட்டாரிடத்திற்குப் போங்கள்.(மத்தேயு 10:5-6)

ஆபிரகாம் தன் மகனைப் பலியிட முற்படும்போது தடுத்த ஆண்டவர் யெப்தா தன் மகளைப் பலியிட முற்படும்போது தடுத்திருக்கலாமே ஏன் தடுக்கவில்லை?

ஆபிரகாம் தன் மகனைப் பலியிட முற்படும்போது தடுத்த ஆண்டவர் யெப்தா தன் மகளைப் பலியிட முற்படும்போது தடுத்திருக்கலாமே? ஏன் தடுக்கவில்லை. 

 

ஆபிரகாமின் விசுவாசத்தைப் பரீட்சித்துப் பார்ப்பதற்காகவே தேவன் அவனது மகனைப் பலியிடும்படி கூறினார். ஆபிரகாம் ஈசாக்கின் மூலமாகத் தன் சந்த்தி விருத்தியடையும் எனும் தேவனது வாக்குத்தத்தத்தை விசுவாசித்து, தான் ஈசாக்கைப் பலியிட்டாலும் தேவன் அவனை உயிரோடு எழுப்பி தன் வாக்குத்தத்தத்தை நிறைவேற்றுவார் என நம்பி தன் மகனைப் பலியிடப் போனான். இது தேவனுடைய கட்டளையின்படியான செயல் என்பதனால் அவன் தன் மகனை பலியிட முற்பட்ட போது தேவன் அவனைத் தடுத்தார். ஆனால், யெப்தாவிடம் தேவன் இவ்விதமாகக் கூறவில்லை. அவனே தனது விருப்பத்தின்படி உணர்சிவசப்பட்டவனாக பொருத்தனை பண்ணி, கவலையோடு தன் மகளைப் பலியிட்டான். அம்மோனியரது ஆக்கிரமிப்பை முறியடிக்க தேவன் தன்னுடைய ஆவியை யெப்தாவிற்கு கொடுத்தபோதிலும் (நியாயதி. 11:29) அவன் தன் மீது வந்த ஆவியானவர் தனக்கு வெற்றியைக் கொடுப்பார் எனும் நிச்சியமற்றவனாக, தேவன் தனக்கு வெற்றியைக் கொடுத்தால் தான் திரும்பிவரும்போது தன்வீட்டு வாசற்படியிலிருந்து தனக்கு எதிர்கொண்டு வருவதைத் தேவனுக்கு சர்வாங்கப் பலியாக செலுத்துவதாக பொருத்தனைப் பண்ணி பின்னர் தனது மகளைப் பலியிட்டான். இவனது பொருத்தனையும் அதன் நிறைவேறுதலும் தேவனுடைய சித்தத்த்தன்படியானதாக இராதமையால் தேவன் அவனைத் தடுக்கவில்லை. தேவன் செய்யச் சொல்லாத்தை நாமாகவே விரும்பிச் செய்யும்போது அதை அவர் தடுப்பார் என நாம் எதிர்பார்க்கலாகாது. 

 

நியாயாதிபதிகள் - 11 அதிகாரம்

29. அப்பொழுது கர்த்தருடைய ஆவி யெப்தாவின் மேல் இறங்கினார்; அவன் கீலேயாத்தையும் மனாசே நாட்டையும் கடந்துபோய், கீலேயாத்திலிருக்கிற மிஸ்பாவுக்கு வந்து, அங்கேயிருந்து அம்மோன் புத்திரருக்கு விரோதமாகப் போனான். 

 

தேவன் தாவீதுக்கு பல மனைவிகளை கொடுத்திருந்தாரா?(2 சாமுவேல் 12:7-8)

பலதரமணம் தேவனால் தடைசெய்யப்பட்டு தண்டிக்கப்பட்டுள்ள போதிலும், இன்றைய கிறிஸ்தவ உலகில் பலதாரமணம் தேவனால் அங்கீகரிக்கப் பட்டுள்ளதென்று தர்க்கிக்கப்படுகின்றது. இதற்கு ஆதாரமாக 2 சாமுவேல் 12:7-8)சுட்டிக்காட்டப்படுகின்றது. இவ்விடத்தில் தீர்க்கதரிசியாக நாத்தான் தாவீதுக்கு தேவனுடைய வார்த்தைகளை அறிவிக்கிறான். “இஸ்ரவேலின் தேவனாகிய கர்த்தர் சொல்லுகிறது, என்னவென்றால், நான் உன்னை இஸ்ரவேலின்மேல் ராஜாவாக அபிஷேகம்பண்ணி, உன்னைச் சவுலின் கைக்குத் தப்புவித்து,8. உன் ஆண்டவனுடைய வீட்டை உனக்குக் கொடுத்து, உன் ஆண்டவனுடைய ஸ்திரீகளையும் உன் மடியிலே தந்து, இஸ்ரவேல் வம்சத்தையும், யூதா வம்சத்தையும் உனக்குக் கையளித்தேன்“ என்று சொன்னான். இதில், “உன் ஆண்டவனுடைய ஸ்திரீகளையும் உன் மடியிலே தந்து“ எனும் வாக்கியத்தை காண்பித்து தேவன், தாவீதுக்குப் பல பெண்களைக் கொடுத்து பலதாரமணத்தை அங்கீகரித்துள்ளார் என சிலர் தர்க்கிக்கின்றனர். எனினும், இது இவ்வசனங்களை சரியாக விளங்கிக் கொள்ளாத்தினால் ஏற்ப்டுள்ள ஒரு தவறான தர்க்கமாகும். “அக்காலத்தில் ஒரு அரசனுடைய மரணத்தின் பின், அவனுடைய வீடும் அங்குள்ளவர்களும், அவனுக்குப் பின் அரசனாகுபவனுக்குக் கொடுக்கப்படுவது வழமை(01) இதன்படி, சவுலின் மரணத்தின் பின், அவனுடைய வீடும் அங்கிருந்தவர்களும் தாவீதுக்குக் கொடுக்கப்பட்டுள்ளனர் என்பதே இவர்களது தர்க்கமாகும். 

“இவ்வசனத்திலுள்ள 'உன்மடியில்' எனும் பதம் மூலமொழியின்படி NIV ஆங்கில மொழிபெயர்ப்பில், 'உன்கரத்தில்' என்றே உள்ளது. இது NASB ஆங்கிலமொழி பெயர்ப்பில் உள்ளதுபோல 'உன் பொறுப்பில்' என அர்த்தம் தரும் வண்ணம் மொழிபெயர்க்கப்பட வேண்டிய பதமாகும். (02) எனவே, தேவன் சவுலின் வீட்டையும் அங்குள்ளவர்களையும் தாவீதின் கரத்தில், அதாவது அவனுடைய பொறுப்பில் விட்டுள்ளார் என்று நாத்தான் தாவீதுக்குச் சொல்லுகிறாரே தவிர, சிலர் தர்க்கிப்பதுபோல, சவுலின் மனைவிகளைத் தேவன் தாவீதுக்கு மனைவியாக்க் கொடுத்தார் என்பது இதன் அர்த்தம் அல்ல. தாவீது உரியாவின் மனைவியாகிய பத்தேசபாளை எடுத்துக்கொண்ட பாவத்தைக் கண்டிக்கவே தேவன் நாத்தான் தீர்க்கதரிசியை அனுப்பினார். எனவே, சவுலின் மனைவிகளைத் தேவன் தாவீதுக்கு கொடுத்திருந்தால், அவன் உரியாவின் மனைவியை எடுத்துக் கொண்டதற்காக அவனைக் கண்டிப்பதும் அர்த்தமற்றதாகவே இருக்கும். மேலும், சவுலுக்கு இரண்டு மனைவிகளே இருந்தனர். இவர்களுள் ஒருத்தி தாவீதினுடைய மனைவி மீகாளின் தாயாகிய அகினோவாம் (1 சாமு. 14:50) இன்னுமொருத்தி ரிஸ்பாள் என்னும் பெயருள்ள மறுமனையாட்டி (2 சாமு 3:7) எனவே சவுலின் மனைவிகளை தேவன் தாவீதுக்குக் கொடுத்தார் என்று சொன்னால் அவர் தாவீதின் மாமிகளை அவனுக்கு மனைவியாக கொடுத்தார் என்றே சொல்ல வேண்டும். இது லேவியராகம்ம் 18:17 இல் தேவன் கொடுத்த கட்டளைக்கு எதிரான செயலாகும். எனவே, இது அர்த்தமற்ற செயலாகும். எனவே இது அர்த்தமற்ற தர்க்கமாகும். “தாவீது இள வயதுடையவனாக இருக்கையி மீகாளை மணமுடித்தமையால் இதன் பின்னர் அவளது தாயை அவனுக்குத் தேவன் மனைவியாக்க் கொடுத்தார் என்பது அர்த்தமற்றதாகும்(02)

2 சாமுவேல் 12:7-8 இல் தேவன் சொல்லும் விடயம் யாதெனில் அவர் சவுலின் வீட்டையும் அங்குள்ளவர்களையும் சவுலின் ராட்சியத்தையும் அதன் குடிமக்கள் அனைவரையும் தாவீதின் பொறுப்பில் விட்டுள்ளார் என்பதேயாகும். அரசன் குதிரைகளையும் மனைவிகளையும் அதிகரித்துக் கொள்ளக் கூடாது என்று தேவன் கட்டளையிட்டுள்ளமையால் (உபா. 17:16-17) அவர் தாவீதுக்கு அதிக மனைவிகளைக் கொடுத்திருக்க மாட்டார். தாவீதுதான் தான் பாலியல் இச்சை காரணமாக பல மனைவிகளை வைத்திருந்தான். தேவன் அவனுக்கு பல மனைவிகளைக் கொடுத்தார் என்று கூறும்போது அவர் தனது திருமணத்திற்கான தனது திட்டத்தை மீறி செயற்பட்டுள்ளார் என அவரை குற்றப்படுத்துபவர்களாக இருப்போம். எனவே, பலதாரண மணம் தேவனால் அனுமதிக்கப்பட்டுள்ளது என தர்க்கித்து தேவனையும் அவரது கட்டளைகளையும் முரண்படுத்தும் பாவத்தைக் குறித்து நாம் கவனமாயிருக்க வேண்டும். ஒருத்தனுக்கு ஒருத்தி என்பதே மானிட திருமணத்திற்கான தேவ திட்டமாகும். பலதாரமணம் அவரால் தடை செய்யப்பட்டுள்ளதோடு அத்தகைய பாவம் அவரால் தண்டிக்கப்பட்டும் உள்ளது. எனவே, நமது அர்த்தமற்ற தரக்கங்களை விட்டுவிட்டு தேவனுடைய வார்த்தையின்படி திருமண உறவில் இருவருக்கும் மேல் இருக்கமுடியாது எனும் உண்மையை ஏற்றுக் கொள்ள வேண்டும். 

References 

(01) 1 & 2 Samuel in the Tyndale OT Commentaries by Joyce Baldwin

(02) Towards Old Testament Ethics by Walter Kaiser   

(இவ்வாக்கமானது Dr. M.S. வசந்தகுமார் எழுதிய திருமறையும் திருமணமும் எனும் நூலிலிருந்து பெறப்பட்டதாகும். வெளியீடு - இலங்கை சத்திய வசனம்)