- See more at: http://www.karpom.com/2012/04/add-related-posts-links-for-blogger.html#sthash.EuBYWtwb.dpuf

Pages

வேதவாக்கியங்களை ஆராய்ந்து பாருங்கள்; அவைகளால் உங்களுக்கு நித்தியஜீவன் உண்டென்று எண்ணுகிறீர்களே, என்னைக்குறித்துச் சாட்சிகொடுக்கிறவைகளும் அவைகளே. (யோவான் 5:39)

Showing posts with label யோவான். Show all posts
Showing posts with label யோவான். Show all posts

Monday, 15 July 2013

ஸ்திரியே எனக்கும் உனக்கும் என்ன? என் வேளை இன்னும் வரவில்லை (யோவான் 2:4)



இயேசுகிறிஸ்துவின் கூற்றுக்களிலேயே கிரகித்துக் கொள்ள முடியாமலிருக்கும் வார்த்தைகள் அவர் தமது தாயாகிய மரியாளை அழைத்து முறையாகும். அவர் எந்த ஒரு சந்தர்ப்பத்திலும் தனது தாயை “அம்மா” என்று அழைத்ததாகச் சுவிஷேசப் புத்தகங்களில் குறிப்பிடப்படாதமையால் அவர் தமது தாயை மதிக்காதவராக அவளோடு கடுமையாக நடந்து கொண்டுள்ளதோக பலர் கருதுகின்றனர். யோவான் எழுதிய சுவிஷேசத்தில் “கானா”(1) என்னும் ஊரில் நடைபெற்ற திருமண விருந்தின்போதும் சிலுவையில் மரிக்கும்போதும் இயேசுகிறிஸ்து தமது தாயை “ஸ்திரியே” என்றே அழைத்துள்ளதை யோவான் 2:4 இலும் 19:26 இலும் நாம் அவதானிக்கலாம். மேலும் அவர் இவ்விதமாகவே ஏனைய பெண்களையும் அழைத்துள்ளதையும் சுவிஷேசப் புத்தகங்கள் அறியத் தருகின்றன. (மத். 15:28, லூக். 13:12, யோவான் 4:21, 20:15) இயேசுகிறிஸ்துவின் சிலுவை மரணத்தின் பின்னர் மரியாளைப் பராமரித்து வந்த யோவான் தனது சுவிஷேசப் புத்தகத்தில் அவளது பெயரைக் கூட குறிப்பிடாமல் மரியாதையாக “இயேசுவின் தாய்” என்று எழுதியிருக்கும்போது (யோவான் 2:1) இயேசுகிறிஸ்து தமது தாயை “ஸ்திரியே” என்று அழைத்தது உண்மையிலேயே பலருக்கு குழப்பத்தை ஏற்படுத்தியுள்ளது. 


தற்காலத்தில் “ஸ்திரீ” என்னும் வார்த்தை ஒரு பெண்ணை அழைப்பதற்குச் சற்று தரக் குறைவாகத் தென்பட்டாலும் (3) மூலமொழியில் உபயோகிக்கப்பட்டுள்ள “குனெய்” (gunai) என்னும் கிரேக்க பதமானது மரியாதைக் குறைவான வார்த்தை அல்ல(4) மேலும் இயேசுகிறிஸ்து சிலுவையில் மரிக்கும்போதும் இவ்விதமாகவே தன் தாயை அழைத்துள்ள போதிலும் “அச்சந்தர்ப்பத்தில்  அவளோடு அவர் கடுமையாக பேசவில்லை”(5) “கிரேக்கத்தில் இது மரியாதையுடனும் பாசத்துடனும் ஒரு பெண்ணை அழைக்க உபயோகிக்கப்படும் வார்த்தையாகும்”(6) அக்காலத்தில் பாசமுள்ள கணவன் தன் மனைவியை அழைப்பதற்கு இவ்வார்த்தையை உபயோகிப்பது வழமை(7) கிரேக்க இலக்கியங்களிலும் அதனை நாம் அவதானிக்கலாம்.(8) உண்மையில் இது மரியாதையுடனும் அன்புடனும் ஒரு பெண்ணை அழைக்க உபயோகிக்கப்பட்ட வார்த்தையாகும்(9) ஆனால் ஒரு மகன் தனது தாயை அழைப்பதற்கு இது பொருத்தமான வார்த்தை என்று கூற முடியாது. “யூதர்களோ அல்லது கிரேக்கர்களோ தங்களுடைய தாயை அழைக்க இவ்வார்த்தையை ஒருபோதும் உபயோகித்ததில்லை. (10)

இயேசுகிறிஸ்து தமது தாயை மரியாதைக் குறைவாக அழைக்காத போதும் தமக்கும் அவளுக்கும் இடையிலான உறவில் ஒரு மாற்றத்தை அதாவது ஒரு தொலைவை (அல்லது இடைவெளியை) அவளை “ஸ்திரி” என்று அழைப்பதன் மூலம் காண்பித்துள்ளார். அதாவது அதுவரை காலமும் மரியாளின் மகனாகச் யெற்பட்ட இவர் ப்போது தேவகுமாரனாகச் செயற்பட வேண்டிய காலம் வந்துவிட்டதை மரியாளுக்கு உணர்த்துவதற்காக தமது பகிரங்க ஊழியக் காலத்தில் அவர் மற்ற பெண்களை அழைத்த விதமாகவே தமது தாயையும் அழைத்துள்ளார். இதை அவரது வார்த்தைகளே அறியத் தருகின்றன. ஏனென்றால் “எனக்கும் உனக்கும் என்ன?” என்னும் அடுத்து வரும் இயேசுகிறிஸ்துவின் வார்த்தைகள் “இரு நபர்களுக்கிடையிலான உறவில் ஒரு இடைவெளி அல்லது தொலைவு இருப்பதைச் சுட்டிக் காட்ட அக்கால யூதர்கள் உபயோகிக்கும் ஒரு சொற்பிரயோகமாகும்”(11) எனினும் அது உச்சரிப்பின் முறையை அடிப்படையாக்க் கொண்டு கடுமையாக அல்லது மென்மையாகச் சொல்லப்படலாம். பிசாசுக்கள் இயேசுகிறிஸ்துவோடு பேசும்போது இச்சொற்பிரயோகத்தை கடுமையாகப் பிரயோகித்துள்ளதை மத். 8.29, மாற்கு 1.24, 4.7, லூக்கா 4.34, 8.28 போன்ற வசனங்களில் நாம் அவதானிக்கலாம். இயேசுகிறிஸ்து மரியாளோடு கடுமையாகப் பேசியிருந்தால் அவரது வார்த்தைகள் “தமது அலுவல்களில் தலையிடாமல் இருக்கும்படியும் தமது விருப்பம்போல செயற்படத் தம்மைவிட்டுவிடுபடியும் கூறுவதாகப் பொருள்படும்.(12) ஆனால், மென்மையாக உபயோகிக்கும்போது இச்சொற்பிரயோகம் கடிந்து கொள்ளுதலை அல்ல. மாறாக, தவறாகப் புரிந்துக் கொள்ளப்ப்பட்டுள்ளதையே சுட்டிக்காட்டும்”(13) இயேசுகிறிஸ்து மரியாளைக் கடிந்துக் கொள்ளாமல், மரியாதையுடனும் பாசத்துடனுமே பேசியுள்ளமையால், அவர் தமக்கும் மரியாளுக்கும் இடையிலான உறவை அவள் தவறாகப் புரிந்துகொண்டிருந்த்தைச் சுட்டிகாட்டுவதற்காக இவ்வாறு கூறியுள்ளார் “அதுவரை காலமும் மரியாளின் அதிகாரத்திற்குக் கீழ்ப்படிந்து வாழந்த இயேசுகிறிஸ்து (லூக். 2:51) அவளது அதிகாரத்திற்குத் தாம் உட்பட்டிருந்த காலம் முடிவடைந்துவிட்டதைச் சுட்டிக் காட்டுவதற்காக அவளை இவ்வாறு ழைத்துள்ளார்.”(14) எனவே மரியாள் இனிமேல் தம்மை அவளுடைய மகனாக மட்டும் பார்க்காமல், தன்னுடைய கர்த்தராகவும் பார்க்கும்படியாக அவளை இவ்வாறு அழைத்துள்ளார். (15)

தமது தாயை “ஸ்திரீயே” என்று அழைத்து, தமக்கும் அவளுக்கும் இடையிலான உறவின் தன்மையை அவள் தவறாகப் புரிந்து கொண்டிருப்பதை அவளுக்குச் சுட்டிக் காட்டிய இயேசுகிறிஸ்து “என் வேளை இன்னும் வரவில்லை”. (யோவான் 2:4) என்றும் கூறினார். யோவானுடைய சுவிஷேசத்தில் இயேசுகிறிஸ்துவின் இக்கூற்று ஐந்து தடவைகள் குறிப்பிடப்பட்டுள்ளதோடு (2:4, 7:6, 7:8, 7:30, 8:20) மூன்று தடவைகள் “என் வேளை வந்துவிட்டது” என்றும் அவர் தெரிவித்துள்ளார். (12:23, 13:1, 17:2) தாம் மரிக்கும் நேரம் நெருங்கிவரும் போதே “என் வேளை வந்துவிட்டது” என்று இயேசுகிறிஸ்து குறிப்பிட்டுள்ளமையால், “அவரது வேளை” சிலுவை மரணம் என்பது தெளிவாகின்றது.(16) சிலுவையில் தம்மைப் பலியாகக் கொடுப்பதற்காகவே இயேசுகிறிஸ்து இவ்வுலகத்திற்கு வந்தமையால், அப்பணியினைச் செய்வதற்காகவே தாம் வந்துள்ளதை ஆரம்பத்திலேயே தமது தாயாருக்கு உணர்த்துவதற்காகவே, தமக்கும் அவளுக்கும் இடையிலான உறவின் தன்மையை சுட்டிக்காட்ட அவர் தமது தாயை “ஸ்திரியே” என்று அழைத்துள்ளார். இயேசுகிறிஸ்து மேசியாவாகச் செயற்பட ஆரம்பித்தபோது அவருக்கும் மரியாளுக்கும் இடையிலான உறவில் ஒரு மாறுதல் ஏற்பட்டதை எவராலும் மறுக்க முடியாது. எனவே, இங்கு எவ்விதர மரியாதைக் குறைவும் அவமதிப்பும் இல்லை. இதனால், சில வேத ஆராய்ச்சியாளர்கள் இயேசுகிறிஸ்துவின் வார்த்தையை “தாயே” என்று மாற்றியுள்ளது போல மாற்றுவதில் அர்த்தமும் இல்லை.(17). கிறிஸ்து மனிதராகப் பிறப்பதற்கு தேவன் மரியாளை உபயோகித்தது உண்மை என்றாலும் அவளும் மற்ற பெண்களைப் போலவே இருக்கின்றாள் என்பதை நாம் மற்க்கலாகாது. (18)



குறிப்புகள்
(1) கானா என்பது பலஸ்தீனாவின் கலிலேயாவிலிருந்த சிறிய பட்டணமாகும். யோவானுடைய சுவிஷேசத்தில் நான்கு தடவைகள் இப்பட்டணம் “கலிலேயிவிலுள்ள” என்னும் அறிமுகத்துடன் குறிப்பிடப்பட்டுள்ளது. (யோவான்2:1, 2:11, 4:46, 21:2) பழைய ஏற்பாட்டிலும் “கானா” என்னும் பெயரில் ஒரு பிரதேசம் இருப்பதனால் (யோசு. 16:8, 19:28), அதிலிருந்து இப்பட்டணத்தை வேறுபடுத்திக் காண்பிப்பதற்காகவே யோவான் நான்கு தடவைகளும் தான் குறிப்பிடும் “கானா” கலிலிலேவில் இருப்பதைச் சுட்டிக் காட்டியுள்ளார். (A.C. Myers, ed., The Eerdmans Bible Dictionary, p. 185) பழைய ஏற்பாட்டுக் கானா ஆசேர் கோத்திரத்தாருக்குக் கொடுக்கப்பட்ட பட்டணங்களில் ஒன்றாக உள்ளது. (யோசு 19:24-28) தற்காலத்திலும் இப்பட்டணம் இதே பெயரில் “தீரு” என்னும் பட்டணத்திற்கு தென்கிழக்கில் 7 மைல்கள் தொலைவில் உள்ளது. (M.H.Woudstra, Joshua: The New International Commentary on the Old Testament, p. 289) யூதவரலாற்றாசிரியர் ஜோசீப்பஸ் என்பவர் ஒரு தடவை தான் கலிலியாவிலுள்ள “கானா“ என்னும் ஊரில் இருந்ததாகவும் குறிப்பிட்ட போதிலும் இப்பெயர் வேறு புராதன இலக்கியங்களில் இடம்பெறதாதமையால், இப்பட்டணம் பிரபலமற்ற ஒரு பிரதேசமாகவே அக்காலத்தில் இருந்திருக்க வேண்டும். (L. Morris, John: The New Internatinal Commentary o the New Testament, p.177) “கலிலேயாவிலுள்ள” என்னும் அறிமுகத்துடன் யோவான் இப்பட்டணத்தைக் குறிப்பிடுவதற்கு இதுவும் ஒரு காரணமாக இருந்திருக்கும். புதைபொருள் ஆராய்சியாளர்கள். தற்போது இஸ்ரவேல் நாசரேத் என்னும் நகரத்திற்கு 9 மைல்கள் வடக்கில் சிதைவடைந்த நிலையில் இருக்கும் கிர்பத் குஆனா (Khirbet Qnana) என்னும் இடமே புதிய ஏற்பாட்டுக்கால “கானா” எனும் ஊர் என்பதைக் கண்டுபிடித்துள்ளார். (D.A.Carson, John: The Pillar New Testament Commentary, p. 168) இவ்விடத்தில் இயேசுகிறிஸ்துவின் காலத்தைய மட்பாண்டத் துண்டுகளும் நாணங்களும் கண்டுபிடிக்கப்பட்டுள்ளன. E.M. Blaiklock & R.K. Harrison, ed., The New International Dictionary of Biblical Archaeology, p.116) “நாசரேத்” என்னும் நகரத்திற்கு நான்கு மைல்கள் வடகிழக்கில் திபேரியாவிற்குச் செல்லும் வழியில் இருக்கும் “கெர்ஃப் கீனா” (Kefr Kenna) என்னும் பட்டணமே புதிய ஏற்பாட்டுக்கால “கானா” என்னும் ஊர் என்று ஆராய்ச்சியாளர்கள் கருதினார்கள். இதனால், கிரேக்க மற்றும் ரோம ஆலயங்கள் இப்பட்ணத்தில் கட்டப்பட்டுள்ளதோடு கிரேக்க ஆலயத்தில் இயேசு கானா ஊரில் செய்த அற்புத்ததில் உபயோகித்தாகக் கூறப்படும் ஒரு சாடியும் காட்சிக்கு வைக்கப்பட்டுள்ளது. ஆனால், இது உல்லாசப் பிரயாணகளினால் இலகுவாக வந்து போக்க் கூடிய இடமாக இருப்பதினாலே இவ்விடத்தில் ஆலயங்கள் கட்டப்பட்டு, இவ்விடமே புதிய ஏற்பாட்டுக்கால கானா என்று கூறப்பட்டு வந்துள்ளது. ஆனால் இதற்குப் போதிய ஆதாரங்கள் இல்லை. இதேபோல, ஆதிச் சபையின் வரலாற்றாசிரியர் இயூசிபியஸ் பழைய ஏற்பாட்டுக்கால கானாவே புதிய ஏற்பாட்டுக்கால கானா என்று குறிப்பிட்டுள்ளதற்கும் எவ்வித ஆதாரமும் இல்லை. (G.W. Bromiley, The International Standard Encyclopedia Volume 1, pp-584-585) மேலும் நாசரேத்திலிருந்து ஒன்றரை மைல்கள் தொலைவில் தாபோருக்குச் செல்லும் வழியில் இருக்கும் “அய்ன்குஆனா” என்னும் இடமே புதிய ஏற்பாட்டுக் கானா என்னும் சிலரது கருத்துக்கு (S.W. Sandy, Sacred Site if the Gospels, p. 24) எவ்வித ஆதாரமும் இல்லை. 

(2) இயேசுகிறிஸ்துவை “மரியாளின் மகன்” என்று குறிப்பிடாமல், மரியாளை “இயேசுகிறிஸ்துவின் தாய்” என்று யோவான் குறிப்பிட்டுள்ளதை நாம் கருத்திற் கொள்ள வேண்டியது அவசியம். இயேசுகிறிஸ்துவின் முக்கியத்துவம் மரியாளிடமிருந்து வரவில்லை. மாறாக, மரியாளின் முக்கியத்துவம் இயேசுகிறிஸ்துவிடமிருந்து அவளுக்குக் கிடைத்துள்ளதை யோவானின் வார்த்தைகள் அறியத் தருகின்றன. (G.L.Borchert, Hohn 1-11: The New American Commentary, pp. 154-155)

(3) வேதாகமத்தின் புதிய இலகு தமிழ் மொழிபெயர்ப்பில் “ஸ்திரியே” என்பதற்குப் பதிலாக பெண்ணே” என்னும் வார்த்தை உபயோகிக்கப்பட்டுள்ளது. 

(4) புதிய ஏற்பாடு ஆரம்பத்தில் கிரேக்க மொழியில் எழுதப்பட்டமையால் புதிய ஏற்பாட்டு வார்த்தைகளின் முழுமையான அர்த்தத்தை அறிந்து கொள்வதற்கு மூலமொழியான கிரேக்கத்தில் உபயோகிக்கப்பட்டுள்ள வார்த்தைகளின் அர்த்தத்தை அறிந்து கொள்ள வேண்டியது அவசியம். 

(5) R.C.H. Lenski, The Interpretation of St. John's Gospel. P.189

(6) H.G. Liddell & R.Scott, A. Greek-English Lexicon

(7) F. Josephus, The Antiquities of the Jews 17.4.74

(8) உதாரணத்திற்கு “ஹேமா” என்னும் இலக்கியத்தில் “ஒடீசியெஸ்” என்பவன் தான் மிகவும் அதிகமான நேசித்த மனைவியை இவ்விதமாகவே அழைத்துள்ளான். அதேபோல, ரோம சக்கரவர்த்தி ஒகஸ்ட்டஸ் என்பவன் “கிளியோபத்ராவை” அழைக்க உபயோகித்த வார்த்தையும் இதுவேயாகும். 

(9) W. Barclay, John Volume one: The Daily Study Bible, p. 98

(10) L. Morris, Expository Reflections on the Gospel of John p. 73

(11) D.A. Carson , John: The Pillar New Testament Commentary, p. 170, நியாதிபதிகள் 11:12 1 ராஜாக்கள் 17:18, 2 ராஜாக்கள் 3:13, 2 நாளாம்ம் 35:21, ஓசியா 14:28 போன்ற வசங்களிலும் இத்தகைய சொற்பிரயோகத்தைக் நாம் அவதானிக்கலாம்

(12) N. Turner, Grammatical Insights into the New Testament, p. 47

(13) W. Barclay, John Volume 1: The Daily Study Bible p. 98

(14) L. Miorris, John: The New International Commentary on the New Testament, p. 158

(15) W,. Hendriksen, New Testament Commentary: John, p. 115 இயேசு கிறிஸ்துவின் பகிரங்க ஊழியம் அவரது குடும்ப உறவினர்களின் கட்டுப்பாட்டின் கீழ் இருக்கவில்லை.(யோவான் 7:3-9, மாற்கு 4:31-35) இதில் அவருடைய தாயினாலும் செல்வாக்கு செலுத்த முடியாது என்பதை இயேசுகிறிஸ்து தமது தாயை ஸ்திரியே என்று அழைப்பதன் மூலம் சுட்டிகாட்டியுள்ளார். மேலும், இயேசுகிறிஸ்து சொல்கின்ற விதமாக செய்யும்படி மரியாள் வேலைக்கார்ர்களிடம் கூறுவது, அவள் அவரது அதிகாரத்தின் கீழ் செயற்பட ஆரம்பித்துள்ளதையே அறியத் தருகின்றது. (G.L. Borchert, John 1-11: The New American Commentary, P. 155-156)

(16)  F. Salvoni ; Nevertheless, My Hour Has Not Yet Come" in Restoration Quarterly, pp.236-241

(17) அண்மையில் வெளிவந்த வேதாகமத்தின் புதிய மொழிபெயர்ப்பான திருவிவிலியத்தில் “ஸ்திரி” என்பது “அம்மா” என்று மொழிபெயர்க்கப்பட்டுள்ள போதிலு “அம்மா” எனும் சொல் தாய் என்னும் பொருளில் அல்ல. பெண்களை மதிப்புடன் குறிப்பிடும் பொருளில் இங்கு கையாளப்படுகின்றது எனும் விளக்கம் அடிக்குறிப்பில் கொடுக்கப்பட்டுள்ளது. ஆங்கிலத்தில் New International Version “அன்பான பெண்ணே” (Dear Woman) என்னும் அர்த்தத்தில் இயேசுகிறிஸ்துவின் வார்த்தையை மொழிபெயர்த்துள்ளது. ஆனால், “அன்பான” என்னும் பதம் மூலமொழியில் இல்லை என்பதை நாம் மறக்கலாகாது. Good New Bible ஸ்திரியே என்னும் வார்த்தையை மொழிபெயர்க்காமல் விட்டுள்ளது. இதனால் இயேசுகிறிஸ்துவின் வார்த்தையிலுள்ள முக்கியமான விடயத்தை இம்மொழிபெயர்ப்பை வாசிப்பவர்களினால் அறியமுடியாதுள்ளது. (B. Newman & E.Nida, A. Translator's Handbook in the Gospel of John, p. 57)

(18) இதனால்தான் பெந்தகோஸ்தே நாளில் பரிசுத்த ஆவியானவருக்காகக் காத்திருந்தவர்களில் மரியாளும் இருந்தாள். (அப். 1:14). ஆதி சபையில் மரியாள் மற்ற பெண்களைப் போல சாதாரணமான ஒரு பெண்ணாகவே இருந்தாள் என்பதை இது அறியத்தருகின்றது. ஆனால் கி.பி. 431இல் எபேசு பட்டணத்தில் கூடிய கிறிஸ்தவ சபையின் ஆலோசனைச் சங்கக் கூட்டத்தில் “தேவதாய்” என்றும் பெயர் மரியாளுக்குக் கொடுக்கப்பட்டது. அதன் பின்னர் கி.பி. 451 இல் “சால்சிடோன்” என்னுமிடத்தில் கூடிய ஆலோசனைச் சங்கத்தில் எழுதப்பட்ட “சால்சிடோனிய விசுவாசப் பிரமாணத்திலும் மரியாள் தேவதாய் என்னும் விடயம் சேர்த்துக் கொள்ளப்பட்டது. கி.பி. 553 இல் கொனஸ்தாந்திநோபிள் என்னும் இடத்தில் கூடிய சபையின் ஆலோசனைச் சங்கக் கூட்டத்தில் மரியாள் மரிக்கும் வரை கன்னிப்பெண்ணாகவே இருந்தாள் என்னும் உபதேசம் கொண்டுவரப்பட்டது. மரியாள் உலகில் வாழ்ந்த காலத்தில் எந்த ஒரு பாவமும் செய்யவில்லை என்று சபைப்பிதா ஒகஸ்டீன் (கி.பி. 354-430) தர்க்கித்து வந்தார். இதனால், பிற்காலத்தில் மரியாள் பாவசுபாவமற்றவளாகவே பிறந்தாள் என்னும் உபதேசமும் உருவானது. இது சர்சபைக்குரிய உபதேசமாக இருந்துவந்த போதிலும் 1854இல் சரியான உபதேசமாகப் பிரகடனப்படுத்தப்பட்டது. அதேசமயம், மரியாள் மரணமடையாமல் பரலோகத்திற்குச் சென்றாள் என்பதும் ரோமன் கத்தோலிக்க சபையின் உபதேசகமாக உள்ளது. (E. iller & K.R. Samples, The Cult of the Virgin, pp19-76; L.Boettner, Roman Catholicism, pp 72-167; W.Webster, The Church of Rome at the Bar of History, pp. 72-89) ஆனால் இயேசுகிறிஸ்துவின் வார்த்தைகள் ரோமன் கத்தோலிக்க சபை மரியாளைப் பற்றி உருவாக்கியுள்ள உபதேசங்களை முரண்படுத்தும் விதத்திலேயே உள்ளது.     

(இவ்வாக்கமானது Dr.M.S. வசந்தகுமார் எழுதிய கர்த்தரின் வார்த்தைகளில் கடின வரிகள் எனும் நூலிலிருந்து பெறப்பட்டதாகும்
வெளியீடு - இலங்கை வேதாகமக் கல்லூரி)




Monday, 22 August 2011

எவர்களுடைய பாவங்களை மன்னிக்கிறீர்களோ அவைகள் அவர்களுக்கு மன்னிக்கப்படும்.....(யோவான் 20:23)


இயேசுக்கிறிஸ்துவின் வார்த்தைகளை தவறாகப் புரிந்து கொள்வதன் விளைவு, பிழையான வேதப் புரட்டு உபதேசங்களின் உருவாக்கம் என்றால் அது மிகையாகாது. வேதவசனங்களைத் தவறாகப் புரிந்து கொள்வதன் மூலமும், தவறாக வியாக்கியானம் செய்வதன் மூமும் பல தவறான விளக்கங்கள் கிறிஸ்தவ உலகில் உருவாகியுள்ளன. அவ்வகையில், யோவான் எழுதியுள்ள சுவிஷேசத்தில உள்ள இயேசுகிறிஸ்துவின் கடினமான கூற்றுக்களில் கடைசியாக உள்ள வசனமும் பாரியதோர் வேதப்புரடடு உபதேசத்தை உருவாக்கியுள்ளது. யோவான்  20:23 இல் இயேசுகிறிஸ்து  “எவர்களுடைய பாவங்களை மன்னிக்கிறீர்களோ அவைகள் அவர்களுக்கு மன்னிக்கப்படும், எவர்களுடைய  பாவங்களை மன்னியாதிருக்கிறீர்களோ அவைகள் அவர்களுக்கு மன்னிக்கப்படாதிருக்கும் “  என்று அறிவித்துள்ளார். இவ்வசனத்தை ஆதாரமாகக் கொண்டு ரோமன் கத்தோலிக்க சபையும், சில வேதப்புரட்டு குழுக்களும் தங்களுடைய மதத் தலைவர்களிடம் (குருவானவரிடம் அல்லது பாஸ்டரிடம்) மன்னிப்பைப் பெற்றுக்கொள்ளும்படி போதித்து வருகின்றன. (1)

இயேசு கிறிஸ்துவின் கூற்றிலுள்ள “மன்னித்தலும்“, “மன்னியாதிருத்தலுமே” மத்தேயுவின் சுவிசேஷத்தில் “கட்டுதலாகவும்“ “கட்டவிழ்க்கப்படுதலாகவும்“ குறிப்பிடப்பட்டுள்ளது. மத்தேயு 18:18 இல் இயேசுக்கிறிஸ்து தமது சீடர்களிடம் “ 'பூலோகத்திலே நீங்கள் எவைகளைக் கட்டுவீர்களோ அவைகள் பரலோகத்திலும் கட்டப்பட்டிருக்கும்; பூலோகத்திலே நீங்கள் எவைகளைக் கட்டவிழ்ப்பீர்களோ அவைகள் பரலோகத்திலும்  கட்டவிழ்க்கப்பட்டிருக்கும்“ என்று கூறினார். இதில் “கட்டுதல்“ என்பது மன்னியாதிருப்பதையும், “கட்டவிழ்ததல்“ மன்னித்தலையும் குறிக்கும் உருவக விபரணங்களாக உளளன. (2) யூதமதப் போதகர்கள் மத்தியில் “கட்டுதல்“ “அவிழ்த்தல்“ எனும் பத்ங்கள் ஒரு காரியத்தை அனுமதிப்பதற்கும் தடை செய்வதற்கும் உபயோகிக்கப்படும் வார்த்தைகளாக இருந்தன. எனினும், ஆரம்பத்தில் இப்பதங்கள் நீதிமன்றத் தீர்ப்புக்களுடன் சம்பந்தப்பட்டிருந்தன. அதாவது, ஒருவனுக்கு எதிராக கொண்டுவரப்பட்ட குற்றச்சாட்டினால் அவன் கட்டப்பட்டிருக்கிறான். அல்லது அதிலிருந்து கட்டவிழ்க்கப்பட்டுள்ளான் என்று அறிவிக்க இப்பதங்கள் உபயோகிக்கப்பட்டன. (3) மத்தேயு 16:19 இல் பேதுருவிற்குக் கொடுக்கப்பட்ட இவ்வதிகாரம் மத்தேயு 18:18 இலும், யோவான் 20:23 சகல சீடர்களுக்கும் கொடுக்கப்பட்டுள்ளது. “மத்தேயுவில் இக்கட்டளை சபை ஒழுக்க நடவடிக்கை எடுப்பதோடு தொடர்புள்ள அறிவுறுத்தலாக உள்ளது. ஆனால் யோவானில், சீடர்களின் சுவிசேஷப் பணியோடு தொடர்புற்றுள்ளது“ (4)  

இயேசுக்கிறிஸ்துவினுடைய வார்த்தைகள், பாவங்களை மன்னிக்கும் அல்லது மன்னியாதிருக்கும் ஆற்றல் சீடர்களுக்கு அருளப்பட்டுள்ளது என்ற அர்த்தமுடையவைகள் அல்ல. “மக்களுடைய பாவஙகள் மன்னிக்கப்பட்டுள்ளது. அல்லது மன்னிக்கப்படவில்லை“ என்று அறிவிக்கக்கூடிய அதிகாரம் அவர்களுக்கு கொடுக்கப்பட்டுள்ளது(5) என்பதையே இவ்வசனம் அறியத்தருகிறது. இது சீடர்களின் சுவிசேஷப் பிரசங்கத்தோடு இணைந்துள்ள ஒரு வி்டயமாக இருப்பதனால், இயேசு கிறிஸ்துவின் இக்கூற்றை சுவிசேஷப் பிரசஙகத்தின் தன்மையை அடிப்படையாகக் கொண்டே நாம் விளங்கிக் கொள்ள வேண்டும். சீடர்கள் அறிவிக்கும் இயேசுகிறிஸ்துவைப் பற்றிய சுவிசேஷப் பிரசங்கம் மக்களின் பாவ மன்னிப்பையு்ம் உள்ளடக்கிய செய்தியாகவே உள்ளது. இயேசுக்கிறிஸ்துவின் சிலுவைப் பலி மக்களுடைய பாவங்களை மன்னித்து அவர்களுக்கு மெய்வாழ்வை அளிக்கும் நற்செய்தியாக மக்களுக்கு அறிவிக்கப்பட்டது. எனவே, சீடர்களின் சுவிசேஷப் பிரசங்கத்திற்கு மக்கள் சரியான விதத்தில் ஏற்றுக்கொண்டு, தங்கள் பாவங்களிலிருந்து மனந்திரும்பி, அவற்றுக்கு இயேசுக்கிறிஸ்துவின் சிலுவைப்பலியின் மூலமே மன்னிப்புக்கிடைக்கும் என்று விசுவாசிக்கும்போது, அவர்களுடைய பாவங்கள் மன்னிக்கப்பட்டன என்று அறிவிக்கும் அதிகாரத்தையே இயேசுக்கிறிஸ்து சீடர்களுக்குக் கொடுத்துள்ளார். அதேசமயம், ஒருவன் இயேசுக்கிறிஸ்துவின் சுவிசேஷத்தை நிராகரித்தால், அவனுடைய பாவங்கள் மன்னிக்கப்படவில்லை என்றும் அறிவிக்கக்கூடிய அதிகாரம் சீடர்களுக்குக் கொடுக்கப்பட்டது (6). “சீடர்களின் விருப்பதிற்கும், தீர்மானத்திற்கு் ஏற்றப்படி தேவன் மக்களுடைய பாவங்களை மன்னிக்கிறவரக இருக்கவில்லை. மாறாக, தேவன் மக்களுக்கு அருளும் மன்னிப்பை அறிவிப்பவர்களாகவே சீடர்கள் இருந்தனர். (7) இதனால்தான் சீடர்கள் “என்னில் பாவத்தை மன்னிக்க முடியும்.“ என்று பிரசாரம் பண்ணிக்கொண்டிருக்கவில்லை. மாறாக, அவர்கள் இயேசுக்கிறிஸ்து அருளும் பாவ மன்னிப்பின் செய்தியையே அறிவித்துக் கொண்டிருந்தார்கள். (8). உண்மையில், “இயேசுக்கிறிஸ்துவை விசுவாசித்து, ஏற்றுக்கொள்பவர்களின் பாவங்களை அவர் மன்னிக்கிறார்“ என்று அறிவிக்கும் அதிகாரமே சீடர்களுக்குக் கொடுக்கப்பட்டிருந்தது. (9). இயேசுக்கிறிஸ்துவின் சுவிசேஷம் மக்களுடைய மன்னிப்பைப் பற்றியதாக இருந்தமையால், தங்கள் பாவங்களிலிருந்து மனந்திரும்பி அச்செய்தியை ஏற்றுக்கொள்பவர்களை இயேசுக்கிறிஸ்து மன்னிக்கிறார் என்பதை அறிந்திருந்த சீடர்கள் அதை அவர்களுக்கு அறிவிக்கக்கூடியவர்களாக இருந்தனர். (10)

பாவங்களை மன்னிப்பதற்கு மனிதனுக்கும் ஆற்றல்  இல்லை என்பதை வேதாகமம் அறியத்தருகின்றது. தேவனால் மட்டுமே பாவங்களை மன்னிக்கமுடியும் என்பதே வேதாகமம் அறியத்தரும் சத்தியமாகும் (மாற். 2:7) இயேசுக்கிறிஸ்து தேவனாக இருக்கின்றமையால் அவர் மக்களின் பாவங்களை மன்னிக்கிறவராக இருக்கிறார். (மத். 9:6) இதனால“ நம்முடைய பாவங்களை இயேசுக்கிறிஸ்துவிடம் அறிக்கையிடும்படியே வேதாகமம் அறிவுறுத்துகிறது. (1 யோவான் 1:9) எனவே, குருவானவர்களுக்கும் பாஸ்டர்மார்களுக்கும் மக்களின் பாவங்ளை மன்னிக்கும் ஆற்றல இருக்கிறது என்ற போதனை வேதப்புரட்டு உபதேசம் ஆகும். மேலும், சுவிசேஷப் பிரசங்கத்தின் மூலம் மனந்திரும்பும் மனிதனுடைய பாவங்களைத் தேவன் மன்னித்துள்ளார் என்று அறிவிக்கும் அதிகாரத்தையே இயேசுக்கிறிஸ்து சீடர்களுக்கும், சுவிசேஷசத்தைப் பிரசங்களிக்கும் ஊழியர்களுக்கும் கொடுத்துள்ளமையால் இயேசு கிறிஸ்துவின் சிலுவைப் பலியின் மூலம் பாவம் மன்னிப்பைப் பெற்று இரட்சிக்கப்பட்டவன், அதன் பின்னர் தான் செய்யும் பாவங்களுக்கு மன்னிப்ப பெறுவதற்காக ஊழிய்காரரிடம் தனது பாவத்தை அறிக்கையிட வேண்டிய அவசியமில்லை. அவன் தன் பாவத்தை நேரடியாக இயேசுக்கிறிஸ்துவிடமே அறிக்கையிட்டு அதற்கான மன்னிப்பைப் பெற்றிடலாம். “இயேசுக்கிறிஸ்துவினுடைய இரத்தம் சகல பாவங்களையும் நீக்கி நம்மைச் சுத்திகரிக்கும் (1 யோவான் 1:7) என்று கூறும் வேதாகமம், நம்முடைய பாவங்களை நாம் அறிக்கையிட்டால், பாவங்களை நமக்கு மன்னித்து எல்லா அநியாயத்தையும் நீக்கி, நம்மைச் சுத்திகரிப்பதற்கு அவர் உண்மையும் நீதியும் உள்ளவராய் இருக்கிறார் (1 யோவான் 1:9) என்னும் சத்தியத்தை அறியத்தருகிறது. “ஒருவன் பாவஞ்செய்வானானால் நீதிபரராயிருக்கிற இயேசுகிறிஸ்து நமக்காகப் பிதாவினிடத்தில் பரிந்து பேசுகிறவராயிருக்கிறமையால் (1 யோவான் 2:1) நாம் அவரிடமே நம் பாவங்களை அறிக்கையிட வேண்டும். தேவனுக்கும் மனிதனுக்கும் இடையில் இயேசுகிறிஸ்து மட்டுமே மத்தியஸ்தராக இருக்கின்றமையால் (1 தீமோ. 2:5-6) நாம் மனிதர்களிடம் நம் பாவங்களை அறிக்கையிட்டால் அவற்றுக்குத் தேவனிடமிருந்து மன்னிப்புக் கிடைக்காது. எனவே, தேவன் அருளும் பாவ மன்னிப்பையும் மெய்வாழ்வையும் பெற்றுக்கொள்வதற்கு மனிதர்கள் இயேசுக்கிறிஸ்துவிடமே தங்களுடைய பாவங்களை அறிக்கையிட வேண்டும். 

Footnote & Reference
(1) Brown, R. 'The Kerygma of the Gospel According to John : The Johnnie View of Jesus in Modern Studies; in Interpretation p. 391 
ரோமன் கத்தோலிக்க சபையில் பாவ அறிக்கை முக்கயமான விடயமாக உள்ளது. பாவங்களுக்கான மன்னிப்பை பெற்றுக் கொள்வதற்காக, அவற்றை சபையினால் அதிகாரபூர்வமாக அங்கீகரிக்கப்பட்ட குருவானவர்களிடம் அறிக்கை செய்ய வேண்டும் என்பது ரோமன் கத்தோலிக்க சபையின் உபதேசமாகும். அறிக்கையிடப்படும் பாவத்தை செவிமடுக்கும் குருவானவர், அதற்காகச் செய்ய வேண்டிய பரிகாரச் செயல்களையும் அறிவிப்பதற்கு அதிகாரம் உண் என்றும் ரோம சபை கூறுகிறது, (L. Boettner, Roman Catholicism, pp196-197)

(2) J.R. Michaels, John : New International Biblical Commentary, pp-349-359)

(3) G.R.Beasley-Murray, John : World Biblical Commentary Vol. 36, p. 383)

(4) D.A.Carson, John : The Pillar New Testament Commentaries, p 655

(5) L. Morris, John : The New International Biblical Commentary on the New Testament, p. 847)

(6) H.J. Cadbury, 'The Meaning of John 20:23, Mathew 16:10 and Matthew 18:18' in Journal of Biblical Literature, pp 251-254, Mantey, J.R. 'The Mistranslation of the Perfect Tense in John 20:23, Mathew 10:19 and Matthew 18:18; in Journal of Biblical Literature, pp 243-249)

(7) M.C.Tenney, John : The Expositor's Bible Commentary Volume 9, p 193

(8) அன்றியும் மனந்திரும்புதலும் பாவமன்னிப்பும் எருசலேம் தொடங்கிச் சகல தேசத்தாருக்கும் அவருடைய நாமத்தினாலே (இயேசு கிறிஸ்து) பிரசங்கிக்கப்படவும் வேண்டியது.(லூக். 24:47) என்று அறிவிக்கப்பட்டபடியே, சீடர்கள் “இயேசுக்கிறிஸ்துவை விசுவாசிப்பவர்களே பாவ மனனிப்பைப் பெறுவார்கள் (அப். 10:43) என்னும் சத்தியத்தை அறிவித்து வந்தனர். 

(9) H.M. Woods, Our Priceless, Heritage, P. 118

(10) W. Barclay, John Volume 2: The Daily Study Bible, P 274.


(இவ்வாக்கமானது Dr.வசந்தகுமார் அவர்கள் எழுதிய கர்ததரின் வார்த்தைகளில் கடின வரிகள் (யோவான் சுவிசேஷத்திற்கான விளக்கவுரை) எனும் நூலிலிருந்து பெறப்பட்டதாகும். வெளியீடு இலங்கை வேதாகமக் கல்லூரி)












Wednesday, 23 March 2011

கிறிஸ்துவிற்கு தேவன் தலைவராயிருக்கிறார் (I கொரி. 11:3)


நூல்: யெகோவாவின் சாட்சிகளுக்கு கிறிஸ்தவனின் பதில்கள்
ஆசிரியர் : சகோ. வசந்தகுமார்
வெளியீடு : இலங்கை வேதாகமக் கல்லூரி

(வேதப்புரட்டர்கள் பிதாவை விட இயேசு தாழ்வானவர் என்பதை நிரூபிப்பதற்காக உபயோகிக்கும் வசனங்களில் ஒன்று I கொரி. 11:3 ஆகும். கொரிந்து நிருபம் இயேசுக்கிறிஸ்து பரலோகத்திற்குச் சென்ற பின்னர் எழுதப்பட்டுள்ளமையால் தங்களின் போதனைக்கு ஏற்ற விதமாக துர்உபதேசங்களை பரப்பி வருகின்றனர். அப். பவுல் இதன் மூலம் என்ன சொல்ல வருகிறார் என்பதை ஆசிரியர் இக்கட்டுரையில் விளக்கியுள்ளார்)

இயேசுக்கிறிஸ்து மனிதராக இவ்வுலகில் வாழ்ந்த காலத்தில் மட்டுமல்ல மாறாக அவர் மகிமையடைந்து பரலோகத்திற்கு சென்ற பின்பும் தேவனைவிடத் தாழ்வானவராகவே இருக்கிறார் என்பதே யெகோவா சாட்சிகளின் போதனையாகும். இதை நிரூபிப்பதற்காக இவர்கள் சுட்டிக் காட்டும் வேதவசனம் I கொரி. 11:3 ஆகும் கொரிந்து நிருபம் இயேசுக்கிறிஸ்து பரலோகத்திற்குச் சென்ற பின்னர் எழுதப்பட்டுள்ளமையால், இந்நிருபத்தில் இயேசுகிறிஸ்துவுக்கு தேவன் தலையாயிருக்கிறார் என்று குறிப்பிடப்பட்டிருப்பது, அவர் மகிமையடைந்த நிலையிலும் தேவனைவிட தாழ்வானவராக இருப்பதற்கான ஆதாரமாய் இருப்பதாக யெகோவாவின் சாட்சிகள் கூறுகின்றனர்(49). “ இயேசுக்கிறிஸ்து எப்போதும் தாழ்வானவராகவே இருப்பதாகவே வேதம் கூறுகிறது.(50) என்பதே இவர்களது கருத்தாகும். எனினும் நாம் ஏற்கனவே பார்த்தபடி இயேசுக்கிறிஸ்து அவர் பிதாவின் வலது பரிசத்தில் வீற்றிருப்பதாகவே வேதத்தில் குறிப்பிடப்பட்டிருப்பதால் அவர் தேவனுக்கு சமமானவராகவே இருக்கிறார் என்பதை மறுக்க முடியாதுள்ளது.
I கொரி. 11:3 இயேசுக்கிறிஸ்து தேவனைவிட தாழ்வானவர் என்று கூறவில்லை. இவ்வசனத்தில் “கிறிஸ்துவுக்குத் தேவன் தலைவராயிருக்கிறார்“ என்று குறிப்பிடப்பட்டுள்ள போதிலும். இது தேவனுக்கும் இயேசுக்கிறிஸ்துவிற்கும் இடையிலான உயர்வுதாழ்வு பற்றிய விபரணம் அல்ல. ஏனென்றால் இவ்வசனம் இடம்பெறும் பகுதியில் தேவனினதும் இயேசுக்கிறிஸ்துவினதும் செயற்பாடுகள் பற்றியல்ல. மாறாக சபையில் ஆணும் பெண்ணும் நடந்துகொள்ள வேண்டிய முறைபற்றியே விளக்கப்பட்டுள்ளது. இதனால் “இயேசுக்கிறிஸ்துவையும் தேவனையும் பற்றிய குறிப்பு இதற்கான உதாரணமாகவே சுட்டிக் காட்டப்பட்டுள்ளது. (52) 3ம் வசனத்தில் “தலை“ என்பதற்கு மூலமொழியில் உபயோகிக்கப்பட்டுள்ள பதம் (kephale) (53) உருவக விபரணமாய் இருக்கும்போது “அதிகாரம்“ அல்லது “ஆரம்பம்“  எனும் இரு அர்த்தங்களைத் தரும்.  எனவே தலையாயிருப்பவர் அதிகாரமுடையவராக அல்லது மற்றவரது ஆரம்பமாக இருப்பதாக இவ்வசனம் கூறுகிறது. (55) எனினும் இவ்வசனம் இடம் பெறும் பகுதியில் வழிபாட்டின் போது ஆணும் பெண்ணும் செயற்பட வேண்டிய விதம் பற்றியே விளக்கப்பட்டுள்ளமையால் அதிகாரம் எனும் அர்த்தமே பொருத்தமுடையதாக உள்ளது(56) உண்மையில். இயேசுக்கிறிஸ்து தேவனின் அதிகாரத்துக்குக் கீழாக செயற்படுவது போல சபையில் பெண்கள் ஆணினுடைய தலைமைத்துவத்திற்கு கீழாகச் செயற்பட வேண்டும் என்பதையே இப்பகுதியில் அப்..பவுல் விளக்கியுள்ளார்.
சபையில் ஆணினுடைய தலைமையின் கீழாகச் செயற்படும் பெண் ஆணைவிடத் தாழ்வானவள் என்று வேதம் கூறவில்லை. ஆணும் பெண்ணும் சம்மானவர்கள் என்பது வேத்த்தின் தெளிவான போதனையாகும். ஆண், பெண் இருவருமே தேவனுடைய சாயலில் சிருஷ்டிக்கப்பட்டுள்ளதோடு (ஆதி. 1:26-28) கிறிஸ்துவுக்குள் இருவரும் ஒன்றாயிருக்கிறார்கள் (கலா. 3:28) எனவே, பெண் பெண்ணுக்குக் கீழாக இருந்து செயற்பட்டாலும் அவள் ஆணுக்குச் சம்மானவளகவே இருக்கிறாள். அதேபோலவே. இயேசுக்கிறிஸ்து தேவனுக்குக் கீழாக இருந்து செயற்பட்டாலும் தேவனுக்குச் சம்மானவராகவே இருக்கிறார். “இயேசுக்கிறிஸ்து தேவன் தலையாயிருப்பது அவரது தேவத்துவத்திலும் தேவதன்மையிலும் அல்ல. மாறாக அவரது செயல்களினாலாகும். (57). இது செயற்பாட்டு ரீதியிலான தலைமையே தவிர மேன்மையான தன்மை அல்ல“(58). நாம் ஏற்கனவே பார்த்தபடி இயேசுக்கிறிஸ்து மனிதராக இவ்வுலகில் இருந்த காலத்திலும் அவரும் பிதாவும் ஒரே தன்மையுடையவர்களாகவே இருந்தனர். அப்படியிருந்தும் இயேசுக்கிறிஸ்து தம்மை பிதாவிற்குக் கீழ்படுத்திச் செயற்பட்டார். இதனடிப்படையிலேயெ இயேசுக்கிறிஸ்துவுக்கு தேவன் தலையாயிருக்கிறார். இது தேவனை விடத் தாழ்வானவர் என்பதற்கான ஆதாரம் அல்ல.

Footnote & Reference
(49) R. Rhodes, Reasoning from the Scriptures with Jehovah’s Witnesses, p.140
(50) Anonymous, Should You Believe in the Trinity? p. 20
(51) என் பிதா என்னிலும் பெரியவராயிருக்கிறார் (யோவான் 14:28) எனும் கட்டுரையை பார்க்கவும்
(52) ,இதனாலேயே 3ம் வசனத்தின் இறுதிப்பகுதியில் தேவனையும் இயேசுக்கிறிஸ்துவையும் பற்றி குறிப்பிடப்பட்டுள்ளது. (C.Blomberg 1 Corinthians: The NIV Application Commentary p 209)
(53) கெஃபாலே (keohale) எனும் கிரேக்க பதமாகும்.
(54) J. Fitzmyer, ‘Another Look at ;Kephale in 1 Corinthians: 11:3 pp503-511)
(55) இவ்வசனம் சபையில் பெண்களின் நிலை மற்றும் அவர்களது ஊழியப்பணிகள் பற்றி நிர்ணயிக்கும் வசனங்களில் ஒன்றாக இருப்பதனால், வேத ஆராய்ச்சியாளர்கள் தலை என்ற பதத்தை அப்.பவுல் என்ன அர்த்தத்தில் உபயோகித்துள்ளார் என்பது பற்றி கருத்து முரண்பாடுடையவர்களாய் இருக்கின்றனர்.பெண்கள் சபையின் ஊழியப் பணிகளில் ஈடுபடலாம். அவர்களும் சபையின் தலைமைத்துவ பதவிகளில் எனும் கருத்துடைய தேவஆராய்ச்சியாளர்கள் இவ்வசனத்தில் தலை எனும் பதம் அதிகாரம் எனும் அர்த்த்த்தில் அல்ல. மாறாக ஆரம்பம் எனும் அர்த்தத்திலேயே உள்ளது என்று கூறுகின்றனர். இவர்களது கருத்தின்படி பெண்ணுக்கு ஆண் தலையாயிருக்கிறான் எனும்போது  பெண்ணுக்கு ஆண் ஆரம்பமாயிருக்கிறான். அதாவது ஆணிலிருந்து பெண் உருவாக்கப்பட்டுள்ளாள் என்றே அப்.பவுல் குறிப்பிட்டுள்ளார். (S.Bedale, The Meaning of ‘Kephale’ in the Pauline Epistles’ pp 211-215; G.D. Fee, The First Epistle to the Corinthians: New International Commentary on the New Testament pp 501-505) ஆனால் இவ்வாதத்தின்படி கிறிஸ்துவுக்கு தேவன் தலைவராயிருக்கிறார் என்று கூறும்போது “இயேசுக்கிறிஸ்து தேவனிலிருந்து வந்தவர். அவர் தேவனால் உருவாக்கப்பட்டவர். எனும பிழையான அர்த்தத்தையே கொடுக்கும் இதனால் இவ்வசனத்தில் தலை என்பதை ஆரம்பம் என்று கருதுபவர்கள் இயேசுக்க்கிறிஸ்துவின் மானிடப்பிறப்பை பற்றிய விபரமாக இதை விளக்குகின்றனர் (Ibid, p.505) ஆனால் இவ்வசனம் இடம்பெறும் பகுதி சபையின் செயற்பாடுகளை அடிப்படையாகக் கொண்ட ஆணினதும் பெண்ணினதும் நிலைமை பற்றிய விபரணமாருப்பதால் அதாவது சபையின் செயறபாடு ஆண் பெண்ணுக்கு மேலானவனாக இருப்பது பற்றிய விளக்கமாயிருப்பதால் இவ்வசனத்தில் தலை என்பது அதிகாரம் என்னும் அர்த்தத்திலேயே  உபயோகிக்கப்பட்டுள்ளது என்பது தெளிவாகின்றது. (C, Blomberg, I Corinthians : The NIV Application Commentary pp 208-209)

(56) சபை வாழ்வில் ஆணிணுடைய தலைமைத்துவத்தின் கீழ் பெண் இருப்பதனால் அதை வெளிப்படையாக் காட்டும் அடையாளமாகப் பெண்கள் தங்கள் தலையை மூடிக்கொண்டிருக்க வேண்டும். என்று இப்பகுதியில் விளக்கியுள்ளார். (1 கொரி. 11:3-15) எனினும் இவ்வடைளம் கொரிந்து பிரதேசக் கலாசாரத்தில் உயர்ந்தவருக்கு முன்பாகத் தாழ்ந்தவர் இருப்பதைக் காட்டுவதாக இருந்துபோல் ஏனைய பிரதேசங்களில் இராதமையால் சகல பிரதேசங்களிலும் சபைகளில் கைக்கொள்ள வேண்டிய முறை இதுவல்ல என்பதையும் 16ம் வசனத்தில் பவுல் சுட்டிக் காட்டியுள்ளார்.

(57) G.B. Wilson I Corinthians : A Digest of Reformed Comment , p.115
(58) R.M. Bowman, Why You Should Believe in the Trinity, p81

 
Footnote & Reference குறித்த எனது சுருக்க விளக்கங்கள்
இக்கட்டுரையில் இலக்கமிடப்பட்டு உ-ம் (49) R. Rhodes, Reasoning from the Scriptures with Jehovah’s Witnesses, p.140 என இருப்பவை Citation ஆகும்
ஆய்வுக்கட்Lரைகள் Citation உடன் எழுதப்படுவது வழமையாகும். குறிப்பிட்ட துறையில் ஆய்வு செய்யப்பட்ட விடயங்களை மீண்டுமாக ஆய்வுக்கு உட்படுத்தாமல் அதனை மேற்கோளாக பயன்படுத்த இம்முறை உபயோகிக்கப்படுகிறது. அதிக Citation உடன் எழுதப்படுபவை அதிக நம்பகத்தன்மை கொண்டவையாக விளங்கும். ஒரு ஆசிரியர் தான் அக்கருத்தை எங்கிருந்து பெற்றார் என துல்லியமாக இவ்வண்ணக்கரு சுட்டிக்காட்டும். ஆனால் Reference பாவித்த முழு நூல்களையும குறிப்பிடுவதால் குறிப்பாக எந்நூலிலிருந்து இக்கருத்தினை பெற்றார் என்பதை துல்லியமாக காட்டுவதில்லை. ஆகவே மேற்குறிப்பிட்டபடி (49) கருத்தை நிருபிக்க R. Rhodes ஆசிரியர் எழுதிய Reasoning from the Scriptures with Jehovah’s Witnesses, நூலில் பக்கம் 140 இலிருந்து அக்கருத்து பெறப்பட்டுள்ளது.
Ibid , - used in formal writing to refer to a book or article that has already been mentioned
ஒரு நூலை மேற்கோளாக காட்டியபின் அதை தொடர்ந்து இன்னுமொரு முறை அதே நூல் மேற்கோள் காட்ட வேண்டிஏற்படின் அதன்போது இம்முறை உபயோகிக்கப்படுகிறது. இதன்போது முழு விபரத்தையும் கொடுக்காமல் Ibid என இட்டு பக்க இலக்கம் மட்டும் குறிப்பிடப்படும்.
Ibid, p.505 என குறிப்பிடப்படுவது The First Epistle to the Corinthians: New International Commentary on the New Testament என்ற நுலின் 505 ஆம் பக்கத்தையாகும்.
Anonymous, ஆசிரியரின் பெயர் இன்னதென்று குறிப்பிடப்பிடாதுவிட்டால் ஆசிரியர் பெயருக்குரிய இடத்தில் Anonymous என இடப்படும். யெகோவா சாட்சிகளின் எந்த வெளியீடுகளிலும் ஆசியர்களின் பெயர்கள் இடம்பெறுவதில்லை (1942 இலிருந்து Nathan Homer Knoor காலத்திலிருந்து) 
Footnote 55
கட்டுரைக்கு மேலதிகமாக எழுதப்படும் விளக்கங்களாகும். இது அக்கட்டுரையை மேலுமாக ஆய்வு செய்வதற்காகவோ அன்றேல் மாற்றுக்கருத்தை சொல்லுவதற்காகவோ உபயோகிக்கப்படலாம். அநேகமாக ஆய்வு செய்வற்குரிய குறிப்புகள் இப்பகுதியில் வழங்கப்படும். ஆய்வு செய்து படிக்கும் வாசகர்களை உற்சாகப்படுத்துவதற்காக வழங்கப்படுகிறது.

Friday, 25 February 2011

என் பிதா என்னிலும் பெரியவராயிருக்கிறார் (யோவான் 14:28)


நூல்: கர்த்தரின் வார்த்தையில் கடினவரிகள்
(யோவான் சுவிஷேசத்திலுள்ள இயேசுகிறிஸ்துவின் கடின வரிகளுக்கான விளக்கங்கள்)
ஆசிரியர் : சகோ. வசந்தகுமார்
வெளியீடு : இலங்கை வேதாகமக் கல்லூரி


(வேதபுரட்டர்கள் இயேசுவின் தெய்வீகத் தன்மையை மறைப்பதற்கு தங்களுக்கு சாதகமாக பயன்படுத்தும் வசனங்களில் இதுவும் ஒன்றாகும். இயேசுவை பிதாவினை விட தாழ்வானவராக காட்டுவதற்கு இவ்வசனத்தை பாவிக்கின்றனர. இக்கட்டுரையில் ஆசிரியர் இத்தகைய கருத்து சரியானதுதான என ஆராய்ந்துள்ளார்.)

இயேசுக்கிறிஸ்துவின் போதனைகளில் சில வாக்கியங்கள் முழுமையாக விளங்கிக் கொள்வதற்குச் சிரமானவைகளாக இருப்பதனால், பலர் அவரை தவறாகப் புரிந்துக் கொண்டுள்ளனர். யோவான் எழுதிய சுவிசேஷத்தில் குறிப்பிடப்பட்டுள்ள இத்தகைய கூற்றுக்களில் ஒன்று. அவரது தன்மையையும் தேவத்துவத்தையும் சர்வவல்லமையையும் அநேகர் சந்தேகிப்பதற்கும் மறுதலிப்பதற்கும் காரணமாயுள்ளது. ஏனென்றால் அவர் பிதாவாகிய தேவனைப் பற்றிக் குறிப்பிடும்போது யோவான் 14:28 இல் என் பிதா என்னிலும் பெரியவராயிருக்கிறார் என தெரிவித்துள்ளார். இயேசுக்கிறிஸ்துவின் தேவத்துவத்தை மறுதலிக்கும் அனைவரும் தங்களின் உபதேசத்திற்கு ஆதாரமாக உபயோகிக்கும் வசனங்களில் இதுவும் ஒன்றாகும்.(1) இயேசுக்கிறிஸ்துவே பிதா தம்மிலும் பெரியவர் என்று கூறியமையால் அவர் பிதாவைவிடத் தாழ்மையானவர் என்றும் பிதாவுக்குச் சம்மான வல்லமையும் தெய்வீகமும் அற்றவர் என்றும் போதிப்பதற்கு வேதப்புரட்டர்கள் இவ்வசனத்தை உபயோகித்து வருகின்றனர்.

இயேசுக்கிறிஸ்துவின் கூற்றுக்களை சரியான விதத்தில் விளங்கிக் கொள்வதற்கு அவை எச்சந்தர்ப்பத்தில் சொல்லப்பட்டன என்பதை நாம் முதலில் அறிந்து கொள்ள வேண்டும். இன்று பலகையான உபதேசக்குழப்பங்கள் கிறிஸ்தவத்திற்குள் புகுந்துள்ளதற்குப் பிரதான காரணம், கிறிஸ்தவர்கள் வேத வசனங்களை வியாக்கியானம் செய்யும்போது(2) அவை சொல்லப்பட்ட சந்தர்ப்பத்தைக் கருத்திற் கொள்ளாமல் அவற்றை வியாக்கியானம் செய்வதேயாகும். உண்மையில் இயேசுக்கிறிஸ்து மனிதராக வாழ்ந்த காலத்திலேயே “என் பிதா என்னிலும் பெரியவராயிருக்கிறார்“ என்று கூறினார். பிதாவுக்குச் சம்மான நிலையில் பிதாவைப் போல தேவமகிமையுடன் இருந்த இயேசுக்கிறிஸ்து தமது பரலோக மகிமையைவிட்டு, மனிதராக தாழ்வான நிலைக்கு வந்தார். இதைப் பற்றி வேதாகமம் விளக்கும்போது பிலிப்பியர் 2:6-7 ல் அவர் தேவனுடைய ரூபமாயிருந்தும், தேவனுக்குச் சமமாயிருப்பதைக் கொள்ளையாடின பொருளாக எண்ணாமல், தம்மைத்தாமே வெறுமையாக்கி, அடிமையின் ரூபமெடுத்து, மனுஷர் சாயலானார். என்று குறிப்பிடப்பட்டுள்ளது. இவ்வசனத்தில் கொள்ளையாடின பொருளாக எண்ணாமல் என்று தமிழில் மொழிபெயர்க்கப்பட்டுள்ள சொற்பிரயோகம் மூலமொழியில் “பற்றிப்பிடித்துக் கொண்டிராமல்“(3) என்னும் அர்த்தமுடையது. எனவே, இயேசுக்கிறிஸ்து தேவனுக்குச் சம்மாயிருக்கும் நிலையைப் பற்றி பிடித்துக் கொண்டிராமல், அதை விட்டுத் தாழ்வான நிலைக்குப் பூமிக்கு வந்துள்ளார்.

இயேசுக்கிறிஸ்து பிதாவைவிட தாழ்வான நிலைக்கு வநதாலும் அவர் தமது தேவத்துவத்தைத் துறந்து விட்டு வரவில்லை. என்பதையும் நாம் அறிந்திருக்க வேண்டும். தேவனோடு சமமாக பரலோகத்தில் இருக்கும் நிலையையே அவர் விட்டு வந்துள்ளார் என்பதை நாம் மறக்கலாகாது. இயேசுக்கிறிஸ்து இவ்வுலக விட்டு மறுபடியுமாக பிதாவிடம் செல்லும்முன்பு அவரோடு பேசும்போது பிதாவே, உலகம் உண்டாகிறதற்கு முன்னே உம்மிடத்தில் எனக்கு உண்டாயிருந்த மகிமையினாலே இப்பொழுது நீர் என்னை உம்மிடத்திலே மகிமைப்படுத்தும் என்று யோவான் 17:5 இல் கூறியமை அவர் தமக்கிருந்த மகிமையையே பரலோகத்தில் விட்டு இவ்வுலகத்திற்கு வந்துள்ளார் என்பதை சுட்டிக் காட்டுகின்றது. பிலிப்பியர் 2:6-7ல் “அவர் தேவனுடைய ரூபமாயிருந்தும்“ என்னும் வாக்கியத்தில் “ரூபம்“ என்பதற்கு மூலமொழியில உபயோகிக்கப்பட்டுள்ள “மோர்பே“ (Morphe) என்னும் கிரேக்கப்பதம் “உட்புறத் தன்மையை குறிக்கும் கிரேக்கப்பதமாகும்.(4) எனவே, இது இயேசுக்க்கிறிஸ்துவின் தெய்வீகத் தன்மையையும் குணவியல்பையும் சுட்டிக் காட்டுகிறது.(5) இயேசுக்கிறிஸ்து இவற்றை விட்டு வந்ததாக வேதாகமம் கூறவில்லை. ஆதியிலிருந்தே தெய்வீக வார்த்தையாக இருந்த அவர் (யோவா. 1:1) மாம்சமாகியபோது, தெய்வீகத்தன்மையை இழந்து மாம்சமாக மாறிவிடவில்லை. யோவான் 1:14 இல் வார்த்தை மாம்சமாகி“ என்னும் வாக்கியத்தில் “ஆகி“ என்னும் பதம் மூலமொழியில் சிறப்பான அர்த்தம் உடையது. இது, “ஒன்றிலிருந்து இன்னுமொன்றாக மாறியதை அல்ல. மாறாக, முன்பு இருந்த நிலையோடு இன்னுமொரு புதிய நிலை சேர்க்கப்பட்டதையே குறிக்கின்றது.(6) அதாவது இயேசுக்கிறிஸ்து மனிதராக இவ்வுலகிற்கு வந்தது தெய்வீகத் தன்மையைத் துறப்பதை அல்ல மானிடத் தன்மைகளை சேர்ப்பதையே அடிப்படையாகக் கொண்டுள்ளது(7). எனவே, அவர் இவ்வுலகத்தில் மனிதராக வாழ்ந்த காலத்திலும் தேவனாகவே இருந்தார் இதனால்தான் ‘தேவத்துவத்தின் பரிபூரணமெல்லாம் சரீரப்பிரகாரமாக அவருக்குள் வாசமாயிருக்கிறது. (கொலோ 2:9 என்றும் “தேவனே மாமிசத்தில் வெளிப்பட்டார்’ (1 தீமோ 3:16) என்றும் வேதாகமம் அறியத்தருகிறது.

இயேசுக்கிறிஸ்து இவ்வுலகத்தில் வாழ்ந்த காலத்தில் முழுமையான தேவனாக இருந்தபோதிலும், பிதாவை விடத் தாழ்வான நிலையிலேயே இருந்தார். ஏனென்றால் பிதா பரலோகத்தில் மகிமை பொருந்தியவராய் இருந்தார். ஆனால் இயேசுக்கிறிஸ்துவோ, பூலோகத்தில் ஏழ்மை நிலையில் வாழ்ந்தார். உண்மையில், இத்தகைய நிலையைக் கருத்திற் கொண்டே இயேசுக்கிறிஸ்து என் பிதா என்னிலும் பெரியவராயிருக்கிறார் என்று கூறினார். அதாவது “இயேசுக்கிறிஸ்து தாம் அச்சமயம் இருந்த நிலையையும் பிதாவின் நிலையையும் ஒப்பிட்டே இவ்வாறு கூறியுள்ளார்.( எனினும் அவர் எப்போதும் இவ்வாறு தாழ்த்தப்பட்ட நிலையிலேயே இருந்து விடவில்லை. உலக மாந்தருடைய பாவங்களைப் போக்குவதற்காக தம்மை பலியாக இவ்வுலகத்திற்கு வந்த அவர், பாவப் பலியாக சிலுவையில் மரித்த பின்னர், உயிரோடெழுந்து மறுபடியுமாகத் தாம் முன்பிருந்த உன்னத நிலைக்குச் சென்றுவிட்டார். அவர் எல்லாவற்றுக்கும் மேலான நிலைக்கு உயர்த்தப்பட்டதை பிலி 2:9-11 அறியத்தருகிறது.(9). உண்மையில் தாழ்த்தப்பட்ட நிலையில் இருந்தபோது அவர் கூறியவை உயர்த்தப்பட்ட நிலைக்கு பொருந்தாது. எனவே, அவர் தாழ்வான நிலையில் இருந்தபோது கூறியவற்றை ஆதாரமாகக் கொண்டு அவர் பிதாவைவிடத் தாழ்வானவர் என தர்கிப்பது தவறாகும். உண்மையில், இயேசுக்கிறிஸ்துவின் இக்கூற்று “அவருடைய தற்காலிக நிலைப் பற்றியதேயன்றி, அவருடைய தன்மையைப் பற்றியது அல்ல(10) என்பதை நாம் மறக்கலாகாது.

இயேசுக்கிறிஸ்து மனிதராக இவ்வுலகில் வாழ்ந்த காலத்திலும் யோவான் 10:30 இல் குறிப்பிட்டுள்ளபடி அவரும் பிதாவும் ஒரே தன்மையுடையவர்களாகவே இருந்தனர். எனவே இயேசுக்கிறிஸ்து பிதாவை விடத் தாழ்வானவர் அல்ல. யோவான் 14:28 இல தாம் பிதாவைவிடத் தாழ்மையானத் தன்மையுடையவர் என்று இயேசுக்கிறிஸ்து குறிப்பிடவில்லை என்பதை மூலமொழியில் உபயோகித்துள்ள பதம் தெளிவாகக் காட்டுகின்றது. கிரேக்க மொழியில் “பெரியது“ (meizon) என்பதையும் “சிறந்தது“ (Kreitton) என்பதையும் வேறுபடுத்திக் காட்ட இரு வித்தியாசமான சொற்கள் உள்ளன. (11) இயேசுக்கிறிஸ்து சிறந்தது “ (Kreitton) என்று அர்த்தம் தரும் பதத்தை உபயோகித்திருப்பாரேயானால் அவரைவிட பிதா உயர்வானவர் என்றே கருத வேண்டும். ஆனால் இயேசுக்கிறிஸ்து உபயோகித்த “பெரியவர்“ என்னும் பதம் தேவத் தன்மையின் மேன்மையினைச் சுட்டிக் காட்டும் வார்த்தை அல்ல. பிதா பரலோகத்திலும் தாம் பூலோகத்திலும் அச்சமயம் இருந்தமையினாலேயே இயேசுக்கிறிஸ்து இவ்வாறு குறிப்பிட்டுள்ளார் என்பதனால் அவர் பிதாவைவிடத் தாழ்வானவர் என்று எவ்விதத்திலும் கூறமுடியாது.

அடிக்குறிப்புகளும் உசாத்துணை நூல்களும்
Footnote and Reference
(1) கி.பி 4ம் நூற்றாண்டில் ஏரியஸ் என்பவரினால் உருவாக்கப்பட்ட தவறான போதகத்திற்கு அதாவது பிதாவாகிய தேவனைவிட இயேசுக்கிறிஸ்து தாழ்வானாவர் என்னும் உபதேசத்திற்கு அவர் உபயோகித்த வசனங்களில் இதுவும் ஒன்றாகும் (L.B. Berkhof, The History of Christian Doctrines pp 84-85) ஏரியனிசம் (Arianism) என்று அழைக்கப்படும் இவ்வுபதேசம் கி.பி 318இல் நைசீயா என்னுமிடத்தில் கூடிய கிறிஸ்தவத் திருச்சபையின் ஆலோசனை சங்க்க் கூட்டத்தில் பிழையான வேதப்புரட்டு என்று கணிப்பிட்டுத் தடை செய்யப்பட்ட போதிலும் அதன் பின்பும் இத்தவறான உபதேசத்தின் செல்வாக்கு கிறிஸ்தவ உலகில் இருந்துள்ளது. (R.E. Olson, The Story of Christian Theology pp 141-160) இன்று யெகோவாவின் சாட்சிகள் இதேவிதமான தவறான உபதேசத்தப் பரப்பி வருகின்றனர். இவர்கள் இவ்வசனத்தை ஆதாரமாகக் கொண்டு “இயேசுக்கிறிஸ்துவின் தன்மை தேவனின் தன்மையை விடத் தாழ்வானது (Anonymous. Let God be true, p110) என்றும் இதனால் “பிதாவைப் போல அவரால் தேவனாக இருக்க முடியாது. (Anonymous Reasoning from the Scripture p410) என்றும் கூறுகின்றனர். இதுபற்றிய மேலதிக விளக்கத்திற்கு ஆசிரியரின் “யெகோவாவின் சாட்சிகளுக்கு கிறிஸ்தவனின் பதில்கள்“ நூலினைப் பாரக்கவும்
(2) இயேசுக்கிறிஸ்து பிதாவுக்குச் சமமானனவர், பிதாவைப்போல் முழுமையான தேவத்தத்துவமுடையவர் என்பதற்கு ஆசிரியரின் இயேசுக்கிறிஸ்து இறைவனா? எனும் நூலினைப் பாரக்கவும்
(3) K. S. Wuest, Philipians in Greek New Testament, pp 64-65
(4) J.B. Lighfoot, Saint Paul’s Epistle to The Philippians PP110, 127-133
(5) G.F. Hawthorme, Philippians, World Biblical Commentary, P84
(6) W, Hendriksen, New Testament Commentary : John P84
(7) M.J. Erickson, Christian Theology P735
( A.W. Pink, Exposition of the Gospel of John, pp281-282
(9) பிலிப்பியர் 2:9-11 ஆதலால் தேவன் எல்லாவற்றிற்கும் மேலாக அவரை உயர்த்தி, இயேசுவின் நாமத்தில் வானோர் பூதலத்தோர் பூமியின் கீழானோருடைய முழங்கால் யாவும் முடங்கும்படிக்கும், பிதாவாகிய தேவனுக்கு மகிமையாக இயேசுகிறிஸ்து கர்த்தரென்று நாவுகள் யாவும் அறிக்கைபண்ணும்படிக்கும், எல்லா நாமத்திற்கும் மேலான நாமத்தை அவருக்குத் தந்தருளினார். என்று குறிப்பிடப்பட்டுள்ளது.
(10) J.C. McDoell, Jesus : A Biblical Defence of His Deity, P87
(11) கிரேக்கத்தில் “மெய்ஸ்ஸொன் (meizon) க்ரீட்டொன் (Kreitton) என்னும் இரு பதங்களும் முறையே “பெரியது“ “சிறந்தது“ என்றும் அர்த்தம் கொண்ட பதங்களாகும்.